賣出語言ê少年人（四）
（原底 tī 2021-04-24 Episode.cc 公開，分兩頁，tī遮做一頁）
（頂一章）
行去X街ê路上，我看著頭前ê車陣佮人海，引我想欲逃走這款狹tsinn-tsinn ê處境。徛tī公車亭仔，按算講搜公車tang時才會到，咧欲the̍h出手機仔app tshiau ê時陣，我看著邊仔有一个穿著白鑠鑠ê女中制服，熟似ê模樣就算這陣仔無相見猶是感覺佮兄弟姊妹仝款親切——tī我ê心內反應進前，我ê喙隨喝出來：
「若琳！妳怎麼在這裡？」
「進峰，你怎麼跑到車站？」
若玲是阮厝邊，in兜是tuì苗栗搬過來ê。Tī國中ê時陣佮我仝班，伊英語比我閣較好，所以我下晡ê教伊理化功課，若琳ê教我一寡袂曉ê英語問題。毋過彼當陣就是單純ê互相鬥相共，干焦知影in 爸阿母有當時仔會用客家語開講——雖然我是聽無——閣有一位欲考大學ê阿兄爾爾，因為彼當陣我興趣臺語，閣愛讀書，mā無時間關心遐有的無的。伊彼陣tuì語言mā無啥物興趣（除了考試以外），所以mā無啥物話題通好開講。
有一日，我tī聽伊教明仔載ê功課煞了後，tī in阿兄ê房間，聽著流行歌，毋過毋是我熟似ê任何一款ê歌曲。我好奇kā問：「妳哥哥在播放什麼歌呢？」。
伊講這是叫做客語ê流行音樂，mā佮我講歌名，毋過伊mā無蓋興趣，所以就干焦知影按呢。我彼時mā是真好奇原來有人用客語寫in家己ê歌，我一个轉來隨拍開搜揣ia̋n-jín揣歌詞，毋過這馬煞想無he ê內容。
若玲共我借問欲去佗位，我就kā賣言語ê代誌共伊講，伊隨hām我講毋通：「你確定你要把臺語賣掉？」
我試共伊問：「妳自己不是也有客語可以賣掉嗎？」
伊煞共我應一句話，予我驚著：「其實我不會說，所以無法賣。」面tshiūnn掛一个無可奈何ê表情。
「妳爸媽不是有時候會講幾句客家話，照理講妳應該會說。」我猶是無死心共伊問。
「我只知道恁早、食飽màng、暗安這些問候語還有簡單的詞，複雜一點的對話我也不知道。或許我太早搬離頭份了？」愈聽愈苦，我實在無想欲閣繼續想起這个話題，這馬ê言語lóng已經有人開始賣掉ê時陣，聽著這款離鄉背井失去喙舌ê案例，誠後悔問伊彼句啊。
這時，我雄雄想著彼條歌，我共伊問：「妳還知道你哥哥放的那首歌嗎？」
「你是說你後來想要上網找的？……我想起來了，不就是那首嗎。」
Tī講出歌名這時陣，鎖匙拍開矣，歌詞若ê發電光ê星仔仝款tsông出來，愈來愈光，規个頭殼內lóng照佮光iànn-iànn，就算其他ê人足無法度理解哪會有一个少年仔起痟，我kā喝出來：
「那遠方的鼓聲又響起，和我說我從哪裡來。」
若玲ê喙唇透出微微仔笑，毋過眼神mā帶一寡複雜，敢若嘛欲hām我講啥物，毋過伊最後mā無講siūnn濟，只是用眼神叫我看著我頭拄仔行過ê路。
「是說我也開始打算學客語，不想要再成為遺憾了。你還確定想要去那邊賣語言？」
「只是觀察他們而已，我知道自己在做什麼。」放心lah，我buē烏白來ê。
只是伊ê目眉猶是訴出伊ê無理解。天色漸漸暗，路燈mā開始咧著，我hàinn手，公車已經入站。
※ ※ ※
落車ê我，入去這條街仔。路燈無tsē，四箍螺仔lóng暗趖趖。看著一隻烏色ê猫仔tuì我頭前tso̍h出來，共我掣一趒：「敢講內底有『巫師』tī遐行法事，抑是有『科學怪人』tī遐舞神經科學ê實驗？」
就佇我phi̍h-phi̍h掣ê時陣，我看著有一个欲倒欲倒、開始漚ê柴kha̋ng-páng，掛tī 五十年ê舊紅毛塗厝，寫「Reicte」。
敢若是遮ê款。代先我毋敢直接入去，我tshàng好冊包仔，tènn做tī邊仔看ê生分人，了解內底pìnn啥物báng，我看著兩个用臺語練仙ê查埔高中生揤電鈴，隨著有一个掛喙罨穿烏衫ê kā in招入去，毋過我無跟綴。Tī 十五分鐘以後，煞予我驚甲目睭強欲脫窗——
我看著兩个人行路phîn-phîn，敢若頭眩目暗，意識不清，毋過面容敢若有馬西馬西ê「爽」ê感覺，閣敢若食著啥物毒品。毋過我看著in喙內底吐ê無半句臺語、英語，連華語都毋成，tshiūnn醉gâ-gâ ê人ga̍uh-ga̍uh唸ê發音——抑是講較準ê，是murmur爾爾。
「敢講in kā意識mā攏偷走矣？
進峰！萬不二汝入去會予in改造到爸母認捌buē出來欲按怎，he就無人通好賠償到原全mā無定著矣！」
我這馬敢若頭前有兩个選項，但是我毋知欲揤佗一个鈕仔。這比我揀tá一个國文選項是正確發音閣較予人感覺心肝若針咧ui。
這个時陣，我看著有一个佮我仝沿ê穿制服ê少女勻勻仔行過來。
「He是若玲ê仝一間學校ê同學mah。遮爾晏嘛欲來賣語言……，敢有遐好趁？」
伊揤電鈴，kā神祕店員問幾句，竟然隨予giú入去內底！女同學傷過驚惶，但是就算硬欲lìng開，mā無法度——毋知是講袂贏店員抑是伊力頭傷過大。毋過這號時陣，我才看著女同學ê面：
「若玲！」
我強欲發出聲。
（下一章）