（本底寫 tī 2020 頂半年，華文翻譯tī下跤）

　　（警告：內底提著家庭暴力）

　　「啥物！汝kā工件做甲公差傷過大，萬不二鬥未合欲按怎？」

　　「毋是講欲3條 (30µm) 以內？」

　　「我不管lah！咱這爿ê標準就是1條！Mè-tah (meter) 一下量就有問題！汝這改薪水無扣袂用得。」頭ê閣一直bih-beh叫：「而且汝bâ-lih-á (burr) 到底是按怎抾ê……」

　　過了下班時間，差不多七點矣。離開暗so-so ê 工場，雖罔過了十冬外，我猶是接載袂牢按呢ê生活，逐工一透早就愛聽頭家喝東喝西，閣有客戶奇奇怪怪ê要求，毋過逐工領ê薪水一年無贏過一年，有當時仔想欲跳槽mā無彼个勇氣。看著衫面頂ê鐵屎kah烏油，我閣吐一聲氣。

　　田園面頂起了一間一間ê鐵棟仔廠房，遠遠是繁華予人迷醉ê臺中市，毋過he mā無法度安慰著我，安慰著這款予人袂當喘氣ê頂下結構佮工期ê壓力，以及毋願閣再想ê過去。

　　以早這个時陣，我pat hām朋友鬥陣做伙去海產店猶是路邊擔仔灌kah醉gâ-gâ，然後行小巷仔bih警察，一下轉厝看著某囝，buē爽就大細聲，有時仔某若硞硞問，著siak物件——連以早丈人送ê花矸to siak kah碎糊糊矣，甚至我mā去過幾若改有粉味ê，彼就毋免koh講詳細。

　　一直到有一日，阮某kā我問：「lóng欲十二點矣，汝到底愛tī外口浪蕩kàu偌久汝才會歡喜？」

　　「汝是按怎暝日攏愛管？」

　　毋過我彼陣mā毋知按怎，規个kā一禮拜ê火氣lóng變做作用tī規手底ê力頭，搧kah伊ê喙䫌紅紅。

　　阮某ê性地誠giám-ngē，干焦堅定閣沓沓仔講：「汝若是無想欲予恁查某囝buē認bat汝這ê爸爸，著mài遐uànn轉來！」

　　對彼工開始，我就無佮hia-ê朋友做伙lim酒矣，因為感覺無意無思。

　　毋過逐工心內底ê酸苦猶是佇咧，仝款ê矮厝、逐家毋是pué家己ê手機仔，看中國來ê笑詼影片笑甲吱吱叫，就是講無幾句生活ê無味日常，嘛是無議量ê代誌，所以我猶是借口交際應酬，煞出去釣蝦仔抑是開車罔踅罔hui。

　　今仔日下晡看著一張廣告，講拄開幕ê「中華釣蝦仔場」最近有特價活動，我想講不如暗暝來去遐罔釣看覓，順紲kā掠著ê蝦仔the̍h來做暗頓食按呢一兼二顧。外口ê冷風愈來愈透，我趕緊催我ê 二手車去D區ê外圍遐看覓。路ni̍h ê車無偌濟，sih-sih tsūn ê風搧路邊ê樹，綿綿仔雨滴tī阮頭前ê車窗。

　　「中華釣蝦場」ê kha̋ng-páng新tshak-tshak，埕外口閣有一面一面恭喜開幕ê花箍，敢若內底一下釣就會當釣規籠，心內開始歡喜，緊kā車隨停予好，the̍h我ê釣竿入去。本底咧看抖音(Tōo-in) 短片ê店員，一下回魂，煞略略仔歹勢ê kā我講：

　　「歡迎！借問汝欲釣幾點鐘？阮遮三點鐘算四百……。」

　　「三點鐘就好。」

　　「按呢汝會當坐彼窟，蝦仔拄好lueh。」

　　彼窟是khah ànn西爿ê，釣ê是真濟，我叫一罐飲料，坐tī角頭仔開始來釣，看著正手爿ê一个大哥tshuā伊ê某囝來陪伊，只不過in後生煞無專心聽in 爸母咧講啥物，佮店員仝款lóng咧pué Tōo-in閣kā lah-pah開咧，內底ê中國腔ê發音響出來，予我小寡仔分心。內容雖罔有一寡趣味，但是我mā錯過浮動ê信號。

　　「夭壽！強欲釣有ê。實在ioh……」hàinn頭ê我，顛倒無法度予我ê心扞予定，卻是引我想起，想起這幾年來這片土地ê變化。

　　我想起著以早tī國校仔讀書ê時陣，有同學in老pē就去對岸彼爿開工場趁錢，hit tang-tsūn伊會tsah一寡彼爿ê oo-mí-á-geh來kā同學分享兼風神，雖然我無目空赤，但是我mā真好奇，有一工，我the̍h出勇氣kā阿爸問——雖然伊有當時仔ē對厝內人動跤動手，所以我毋敢直接講：「咱tau ê工場tang時ē徙去大陸？」

　　「汝叫是阮兜有遐大斗？」

　　我毋敢予伊bo̍k，隨恬恬矣。

　　毋過，隨著新聞講彼爿有真濟人趁甲淹跤目，mā有足tsē人走去遐做幹部。我mā是開始欣羨這款ê生活。甚至有一工我予老pē phah kah烏青ê，予伊hòo出去ê時陣，我mā看著天頂ê月娘，想講：「總有一工我欲去彼爿發展！」

　　這時，浮動一下掣，我giú ê時陣傷過緊，結果蝦仔koh予伊逃走ah。

　　時間已經過了點半鐘，我應該著閣較專心咧！人額已經少三、四成，這改凡勢有機會釣有。

　　看著深深koh青青ê窟仔水，佮我頭一改釣蝦仔ê時陣，池仔ê色水相siâng。

　　彼時我拄仔好退伍，我較無彼个才調koh讀研究所，所以姑不而將就接手厝內ê事業才兩三個月，雖然mā是有buē少ê無奈。予我以早國校仔ê同學相招，我就tshuā我ê姼仔去附近ê蝦仔場。彼時我袂曉釣蝦仔，見釣見落勾，我就看同學釣，聽in按怎教，順紲tī邊仔烘蝦仔。

　　「Eh，最近北京teh辦奧運，最近恁工場ê訂單應該buē少oh！」放假轉來臺中ê阿忠kā我問。

　　「就算訂單buē少，我干焦是一个師仔，對我來講mā無差……是講汝佇園區應該mā較好pah？」

　　「自從分紅費用化了後，較無行情loh！」阿忠講：「我最近mā想欲調kàu大陸彼爿ê分公司tsoh-sit。」伊ê眼神充滿期待。若是我有能力，我mā想欲tshuā阮姼仔做伙去，彼時我按呢想。

　　我以早無看過伊按呢正面ê笑容，以後mā毋bat看過。彼時我mā堅心相信，景氣遐爾仔好，總有一日我若是khiû-khiû儉儉，做無四十歲就通好買著一間厝，毋免行阿爸 ê錯路。

　　自從彼改了後，我就無koh看著伊，毋過聽別个同學提起伊成功搬kàu深圳矣。

　　毋過知影彼个消息ê時，拄好是隔轉年，厝內工場ê支票lóng變菝仔票，佮足tsē公司仝款收無錢，現金無法度周轉，咧煩惱敢欲收工場ê時陣，tī進前阮姼仔khà電話予我，講伊ê驗娠筆 (giām-sim-pit) 出現兩條線。

　　「Ái-ioh！Koh釣無！」

　　啉了最後一喙飲料，我ê網仔內底無半尾蝦仔。池仔墘干焦賰八、九ê人，原本坐我邊仔ê彼家伙仔mā因為囡仔直直吵足無聊就先來轉矣。就算koh賰半點鐘，我因為感覺傷過無議量，所以我就收餌、線、釣竿kah空空ê網仔，腹肚枵枵mā來走。店員ê面略略仔漚，中華釣蝦仔場ê大門離我愈來愈遠。

　　La-jí-oh 咧播出 tsìr-tsńg tshiang-iân（字正腔圓）ê 毋知名 ê 少年仔樂團ê歌，我看著路ni̍h，店家十間有八間lóng收擔矣，稀微ê雨愈來愈大，雨撇仔tī暗夜一直撇。看著暗淡ê街仔路，我雄雄想著，阿忠聽講因為一寡原因，所以欲轉去別位食頭路矣。

　　轉來阮稅來ê厝，某佮囝lóng已經先睏矣，規間厝敢若無人ê墓仔埔，雖然無空空闊闊，但是恬tsù-tsù kah連鳥鼠仔都毋敢出聲。只有時鐘ê秒針ti-tí ta̍h-ta̍h，回聲tī我ê心內底，較早一个人騎tī暗路、做兵徛哨lóng無感受過ê——

　　闊lóng-lóng，無半項物件佮代誌。

華文翻譯

　　（以下是華譯版。警告：裡面提到家庭暴力）

　　「什麼！你將工件做到公差太大，萬一接不合怎麼辦？」

　　「不是說要三條（30微米）以內？」

　　「我不管啦！我們這邊的標準就是1條！量表一量就有問題！你這次薪水不扣不行。」頭家又一直喊叫：「而且你毛邊到底是如何修的……」

　　過了下班時間，差不多七點了。離開昏暗暗的工場，雖然過了十年多，我還是忍受不了這樣的生活，每天一大早就要聽老闆東喊西喊，還有客戶奇奇怪怪的要求，但是每天領的薪水一年沒勝過一年，有的時候想要跳槽也沒那個勇氣。看著衣服上邊的鐵屑和機油，我又嘆一聲氣。

　　田園上面蓋了一間一間的鐵皮廠房，遠遠是繁華令人癡醉的臺中市，不過那也無法安慰我，安慰這種叫人無法喘氣的頂下結構與工期的壓力，以及不願又再想的過去。

　　以前這個時候，我曾和朋友一起結伴去海產店或是路邊攤灌得醉醺醺，然後走小巷子躲警察，一回到家看到妻兒，不爽就大小聲，有時候老婆若是一直問，就摔東西——連以前岳父送的花瓶都摔得碎爛爛了，甚至我也去過幾次有女人的地方，那就不須再明說。

　　一直到有一日，我老婆問我：「都要十二點了，你到底要在外頭放蕩到多久你才會高興？」

　　「妳為何日夜都要管？」

　　但我那時也不知怎樣，整個將一星期的火氣都變成作用在整手掌的力氣，掌摑到她的臉頰紅紅的。

　　我老婆的性子真堅毅，只是堅定而慢慢的講：「你若是不想要讓你女兒不認得你這個爸爸，就別這麼晚回來！」

　　自那天開始，我就沒跟那些朋友一起喝酒了，因為感到沒意思。

　　但是每天心裡頭的酸楚還是存在，同樣的矮房、大家不是滑自己的手機，看中國來的搞笑影片笑得吱吱叫，就是講沒幾句生活的無味日常，也是無趣味的事情，所以我還是藉口交際應酬，卻出去釣蝦子還是開車隨便溜達。

　　今天下午看到一張廣告，說剛開幕的「中華釣蝦場」最近有特價活動，我想說不如晚上來那隨便釣看看，順便將抓到的蝦子拿來當晚餐，這樣一舉兩得。路上的車沒多少，一直吹的風搖動路邊的樹，濛濛細雨滴在我前頭的車窗。

　　「中華釣蝦場」的招牌非常的新，廣場外頭還有一面一面恭喜開幕的花圈，好像裡面一釣就能夠釣整籠，心中開始快樂，急忙把車馬上停好，拿我的釣竿進去。本來看抖音短片的店員，一回魂，卻有點不好意思的對我說：

　　「歡迎！請問你要釣幾小時？我們這邊三小時算四百……。」

　　「三小時就好。」

　　「這樣你可以坐這池，蝦子剛放下去。」

　　那池是比較向西邊的，釣的人是很多，我叫一罐飲料，坐在角落開始來釣，看到右手邊的一個大哥帶著他的妻兒來陪他，只不過他兒子卻沒專心聽他父母在說什麼，和店員同樣都正滑抖音還將喇叭開著，裡面的中國腔的發音響出來，令我有點分心。內容雖然有一點有趣，但是我也錯過浮標的信號。

　　「夭壽！差點釣到的。實在唷……」搖頭的我，反倒無法將我的心定下來，卻是引我想起，想起這幾年來這片土地的變化。

　　我想起著以前在國小讀書的時候，有同學他老爸就去對岸那邊開工廠賺錢，那時候他會帶一些那邊的土產來對同學分享順便炫耀，雖然我沒眼紅，但是我也真好奇，有一天，我拿出勇氣問爸爸——雖然他有時候會對家人動手動腳，所以我不敢直接說——：「我們家的工廠何時會搬到大陸？」

　　「你以為我們家有那麼多錢？」

　　我不敢被他揍，就馬上緘默了。

　　不過，隨著新聞講那邊有真多人賺到錢淹腳踝，也有很多人跑去那邊當幹部。我也是開始羨慕這種的生活。甚至有一天我被老爸打到瘀青的，被他揮出去的時候，我也看著天上的月亮，想說：「總有一天我要去那邊發展！」

　　這時，浮標一顫動，我拉的時候太快，結果蝦子又讓牠逃走了。

　　時間已經過了一個半小時，我應該要更加專心呢！人數已經少三、四成，這次可能有機會釣到。

　　看著深深又青綠色的池水，和我頭一次釣蝦子的時候，池子的顏色相似。

　　那時我剛好退伍，我較沒那個能力再讀研究所，所以姑且就接手家裡事業才兩三個月，雖然也是有不少的無奈。被我以前國小的同學邀請，我就帶我的女友去附近的釣蝦場。那時我不懂釣蝦子，每次釣每次不中，我就看同學釣，聽他們如何教，順便在旁邊烤蝦子。

　　「欸，最近北京在辦奧運，最近你們工廠的訂單應該不少喔！」放假回來臺中的阿忠問我。

　　「就算訂單不少，我只是一個學徒，對我來講也沒差……是講你在園區應該也比較好吧？」

　　「自從分紅費用化了後，較無行情囉！」阿忠講：「我最近也想要調到大陸那邊的分公司工作。」他的眼神充滿期待。若是我有能力，我也想欲帶我女友一起去，那時我這麼想。

　　我以前沒看過他如此正面的笑容，以後也不曾看過。那時我堅心相信，景氣如此得好，總有一天我若是省吃儉用，工作不到四十歲就可以買到一間房子，不用走爸爸的錯路。

　　自從這次之後，我就沒再看到他，但是聽別的同學提起他成功搬到深圳了。

　　不過知道那個消息的時後，剛好是隔年，家裡工廠的支票都變芭樂票，和很多公司一樣收不到錢，現金沒法子周轉，正煩惱要否結束工廠的時候，在之前我女友打電話給我，說她的驗孕筆出現兩條線。

　　「哎唷！又釣不到！」

　　喝了最後一口飲料，我的網子裡面沒半條蝦子。池邊只剩八、九個人，原本坐我旁邊的那家子也因為孩子一直吵好無聊就先回去了。就算還剩半小時，我因為感覺太過無興味，所以我就收餌、線、釣竿和空空的網子，肚子空空也離開。店員的臉色些微的不好，中華釣蝦仔場的大門離我愈來愈遠。

　　收音機正播出字正腔圓的不知名的年輕人樂團的歌，我看著路上，店家十間有八間都收攤了，稀微的雨越來越大，雨刷在黑夜一直擺動。看著暗淡的街道，我突然想到，阿忠聽說因為一些原因，所以要回去別的地方謀生了。

　　回來我租來的房子，妻兒都已經先睡了，整間房子很像沒人的墓場，雖然沒有寬寬闊闊，但是安安靜靜得連老鼠都不敢出聲。只有時鐘的秒針滴滴答答，回聲在我的心裡面，以前一個人騎在夜路、當兵站哨都沒感受過的——

　　寬寬敞敞，沒半點東西和事情。