我看著兩天前對妳說的話，以及妳的個人頁面快覽，默默無語。

那是對妳去的咖啡店的布朗尼很讚的回覆，以及顯示妳將我unfo的個人資料頁面說明。

（Hô-ló話）這是我ê「BlogBlog 同樂會 - 2026 年 10 月」ê投稿文。Tsit個月主題是「語言ê學習、傳承kap推廣」，由 AngeCI 主持。準講你有家tī ê Blog，歡迎做伙參加！
（華語）這是我的「BlogBlog 同樂會 - 2026 年 10 月」的投稿文章。本月主題是「語言的習得、傳承與推廣」，由 AngeCI 主持。如果你有自己的部落格，歡迎一起來參加！

（更新日：2026-11-02）

臺文

因為beh講ê代誌kap回顧誠tsē（包含其他若在地化 (localization) 、詩以及技術文章攏ē當寫），限制佇文章ê sài-suh，就專門kā我家己對Holopedia，以及故事ê創作寫落去。

（總紹介）

海湧猶原咧hoa-hoa吼，佇熱天ê尾溜，怨嘆著歇熱ê結束。

佇望夕海墘，已經接近欲暗仔，毋過天色猶未暗落，我一个{rb|儂|lâng}徛佇沙埔頂——四周圍無啥物儂，干焦風搖東爿木麻黃，sa-sa叫，替我訴心內ê孤單。

想起三個月以來發生ê代誌，除了是無法度用言語講予徹底ê悲傷，嘛是予我吐大氣，因為遮ê代誌相連紲，無咧停，若無擋仔ê自強號，{rb|向|ǹg}我挵過來……

（頂章）

「所以汝後來就隨走出去？」Helen佇線頂問。

「著ah，chit款情形確實危險，結果出來ê時陣，天頂無落雨，拄好出日頭，我就緊走ah

A̍h汝有án-nóa無？」

「無lah！Chit款場面in mā無可能掠儂，佇十二月十號chhìn-chhái掠，國際會有足大ê非難。而且語言學會講in家己會hām學校協調án-nóa換新ê breaker，chit件代誌in就放我過。Iáu m̄-koh……」

「！？」

「若準講當局發現我舞hiah大ê代誌是thiau工ê，定著bōe放咱煞。」Helen佇計算機中心拍字予Theng ê時陣，心肝頭感覺誠虛，嘛誠煩惱，足想欲有一个儂通好倚靠，共伊心中ê驚惶訴出來，若像淹水ê儂咧揣求通搝ê索仔。

毋閣伊虧欠Theng足濟——有可能是伊ê自由、笑面佮青春，金錢有可能通賠，時間煞無得通。雖然伊是上好ê朋友，但是佇taⁿ 壓力蓋大ê情況，無應該閣予伊ê心思著磨。

「面對『thiàⁿ』kap『ài』ê差別，我這馬欲按怎揀？

（更新日：2026-11-01）

（頂章）

冷冷ê風、卡雺ê山、一臺o͘-tó͘-bái、兩个查某囡仔。

「所以，這馬in已經知影咱ê行蹤矣？」我問。

「根據我ê了解，in已經共咱ê詳細攏知影甲一清二楚，照按呢落去，搝網只是早慢ê代誌。」羽柔講。

「汝是按怎知ê？」我誠實真好奇，伊無應該是教官室ê透仔，毋過伊哪會遐知影教官室ê動態？伊的確是誠神祕ê儂——毋過引我那來那好奇，我誠實想欲知影閣較濟伊ê代誌！

毋過伊猶原專心駛車，恬靜猶原佇阮兩儂中間，干焦iăn-jín聲共我回應，佇南下ê路途。

（頂章）

彼工落尾猶是到矣，天色因為烏雲崁牢這塊盆地，就算欲中晝，猶原是暗眠摸。羽柔徛佇公車頂，看著因為茫茫小雨滴佇窗外，街仔路佮捷運工程ê圍籬變做花花花，閣想起前幾工ê代誌。

伊彼工看見Theng所寫「這看起來只是一般ê討論會，應該無啥物問題」這款話，心肝強欲凝去，若當頭對面，會氣甲想欲共伊ê肩胛頭掠予絚，前後共伊搖醒：

汝當做彼工是啥物時陣，十二月初十neh！西方國家會用大蕊目睭共臺灣看詳細，有啥物爭差就點名做記號，政府敢會毋知？汝這个戇大呆！

（頂章）

隔轉工，羽柔倒去計算機中心，揣著離別儂上遠ê位置，開電腦，閣若鳥鼠仔仝款四界chhiau看，敢無其他ê儂看ǹg伊彼爿後，龜龜鱉鱉用Conexion共Peter所提供ê《自由台文》ê內容載落來。

伊一下開，看見頭一條是懷念故鄉小食擔ê短篇散文，咧佳哉無啥物怪奇ê內容ê時陣，讀著下跤ê詩，拄開始略略仔暢，煞顛倒起畏寒，目睭擘佮欲脫窗，喙嘛合袂起來——

「一ê舞女

誠chē主儂

逐暝bōe睏　寂靜寂靜

直直giâu疑

敢有法度

毋免予in牽手

跳舞蹈　逍遙自在

（頂章）

肅殺無聲ê警備指揮部（我嘛無確定敢是），雖罔佮會當喘氣ê外圍，干焦隔一塊牽鐵線網ê壁，但實際比星辰閣較遠。

已經毋知影幾點鐘，可能是十幾點鐘，毋過斟酌想嘛無意義，連日時暗暝攏毋知。這个狹kheh兩三坪ê間仔，無水，無食物，無時鐘，無出入ê希望，嘛無窗仔佮日光，只有兩个共阮苦刑ê查埔軍人。彼葩永永袂關，顛倒那來那大葩、那來那光ê電火胿仔，以及袂當控制家己咧想，毋知影in閣會對阮怎樣粗殘ê恐怖，不斷共我ê靈魂蒸發、搖掣甲毋成型。

閣想起一本小說所講ê「咱會佇無烏暗ê所在相見」，這馬才知影伊真正ê意思，毋過已經無氣力閣想矣——我感覺理智已經佇失去時間、無食、無啉、無睏佮喝罵聲，漸漸對身軀剝開，足驚會剝甲啥物款ê程度。就算猶原出全力堅持。

（頂章）

彼工，是我上尾改看見伊ê日。

我已經無法度想詳細，彼陣按怎離開無底ê深淵，干焦了解，佇出大門ê時，雖然我ê雙手無受束縛，但是迎接我ê毋是通小寡喘氣ê，相對較自由ê空間，煞是無底、予儂袂喘氣ê苦刑ê，彎曲閣狹kheh ê小路。重hoâiⁿ-hoâiⁿ ê大支柴枷，硩佇我ê頷仔頸，予我干焦會當蹁蹁仔行，一世儂無法度敨開——因為伊失神、慼心，koh kâⁿ苦恨ê目睭，已經宣判我ê刑期。

（頂章）

猶原是這片海墘，熱天尾ê下晡，雖然因為三四年前整修，比以早有閣較濟ê儂來遐𨑨迌，毋過海埔猶原闊闊，歡迎所有ê儂。

羽柔一个儂踮佇海岸，予海風拍摸伊ê面——雖罔伊已經取得博士，開始佇S大學中文系食助理教授ê缺，但是猶原佮少年時仝款，憂悶鬱卒甲袂喘氣ê時，會來遮放予空。望夕海墘毋但是伊ê閃風港，伊嘛定定佇遐思考，彼一工到底敢會來。