賣出語言ê少年人（一）

（原底 tī 2021-04-19 Episode.cc 公開）

　　 「現下在網路面項發現有人po徵求『賣言語』个文章，根據獨家訪問，蓋多个後生人賣忒自家个語言，賣忒語言个，就會失去大部份个講話同聽識別人講話个能力，言語學家表示蓋愁慮。以下係本臺个報導……」主播用客語講。

　　阿爸凊彩捘電視臺，看著客話放送ê「有人徵求語言」ê新聞，就算字幕是華語ê，也是看甲霧sà-sà：

　　「天下跤敢真正有人kā家己ê言語賣掉ê？」

　　「資本主義內底，應該無啥物不能賣出的吧？連鮭魚都可以讓人改名了。」我本底想欲用臺語應，是講我ê語言能力綴袂牢頭殼ê反應，結果落馬猶是用華語收煞。感覺真礙虐。

　　這馬時間已經是七點半，阮小弟按怎樣猶未轉來？我雄雄想著伊較早hām我講ê話，一个想起這个新聞ê時——

　　「聽講最近學校附近有一个語言調查，我想欲來去看覓。」

　　「這个語言調查是啥款？」我問。

　　「我mā毋知影詳細，敢若是臺語等等ê調查，無包括英語。」

　　「感覺怪怪，著注意安全！」

　　我彼陣仔感覺心內無定，毋過毋知按怎講出來，但是我看著這篇新聞，雄雄喝出：「敢講……？」。

　　「是咧敢講啥，喝遐大聲？」阿爸略仔驚著。

　　我當咧毋知影欲按怎講ê仝時陣，有人用熟似ê音色喝：

　　「Uò huê-lâi–lorh!」（我回來了）

　　毋是臺語。

　　毋是臺語！？

　　我確認過矣，毋是臺語。

　　的的確確是華語！

　　伊四常lóng用臺語應門ê敢毋是？

　　「阿志，汝今仔日有影怪怪，有按怎無？」阿爸問。

　　「Mê sâr–ah?」（沒啥啊）

　　「咱兜講臺語ê，上無會曉講一兩句mah？汝講幾句看覓！」我隨講這句話。

　　「Nì tsái so sâ, uò pú tòng.」（你在說啥，我不懂）

　　我hàinn頭用華語：「我們家多少都會用台語，你以前最少會講幾句話吧？你說幾句看看。」

　　「彼个……he……我袂曉講Táiyŭ la！」汝激出一張「毋捌就毋捌無欲按怎」ê表情。

　　「跟我翻譯『香港的香很香』看看！」阿爸kā考。

　　「Hiong-káng ê hiong hèrn hiang？」

　　「敢有人kā『足芳』讀做『hèrn hiang』ê？四、五歲ê mā buē按呢講！宇志！汝敢真真正正kā語言賣掉矣？」阿爸問，不管伊捌猶是毋捌。

　　阿爸雖罔無大聲，阿爸kā目睭gîn甲欲比夜市仔ê鳥仔卵閣較大，強強脫窗矣，面tshiunn ê血管mā欲phok出來矣。

　　（下一章）