我有一个思想ê實驗：設使一个社會，若準講逐个成員攏是體罰ê苦楚大漢，而且攏無外來思潮傳入去講「毋通體罰囡仔」，結果若是𪜶ê囡仔按呢晟養大漢，囡仔雖然攏掠體罰教育做無好，𪜶敢袂中止對𪜶ê囝受體罰？
我ê回答，雖罔誠悲觀，但是因為𪜶毋知影閣有其他教育囡仔ê可能，就算按呢無好，按呢ê文化嘛是像咒詛仝款代代傳落去。
體制親像按呢，若是無其他ê外力強勢影響，常常儂袂當清楚看見家己ê問題。就算講是看見問題，嘛毋知影按怎共破解，因為體制通常會鼓勵儂kā維持，beh佇體制內底搜出破解ê方法的確是佇沙漠掠大隻魚仝款，nó͘捽。
就按呢，真濟查埔儂佇憂傷鬱卒中，定定猶原倚靠燒酒解憂愁。性ê書寫部份，女性原仔干焦通用男性ê立場代入，正通摕著其中ê權力。教育按怎改變制度，囡仔猶是升學軍備競爭ê受難者，而且自國校仔就開始擘腹。佇大都市內底，原底講客語佮Hô-ló話ê城市，煞逐家毋敢得失官話霸權ê體制，干焦預設逐家攏用毋是伊ê父母話講話，就算知影伊佮我是仝族ê儂。
面對當前若萬丈懸山ê體制，就算我受著ê社會學智識講，體制嘛需要儂維持、閣生產，但是毋是所有ê儂攏遐有勇氣反抗，而且捷捷ê受著騷擾、非難、敵對以及物議。當然有身軀邊ê儂支持上蓋好，但是這嘛是chhiàng-suh-chhìang-suh。
嘛是有儂掠做，總是改變無望，就冷淡看世事，莫插世間代。但是按呢體制山無可能改變，而且閣有可能變做「犬儒主義」ê問題，按呢就會對失望ê變做是佮體制徛仝爿做伙打壓ê，顛倒較害。
有一位朋友講，就算知影體制強強拍袂倒，猶原愛對身邊ê儂溫柔。我咧想，就算講體制無可能改變，但是上少個人會當做會到。我家己嘛是無法度有心靈ê a-só͘-bih溫柔相款待身邊ê儂，這通是我學習ê目標。
毋過若準講有儂認為這个社會無得通救，就無想欲生囝咧？我家己ê看法，除非汝會當共思想續予後輩，無後一代無認同汝ê儂定著會閣較濟，雖然按呢會當避免加添新ê儂面對體制ê煩惱。
講遐濟，我嘛是無答案。但是我認為，上重要就是看見問題，而且盡量照汝所通做來改變（了解道理，閣愛行道理），莫kap體制徛仝陣應該是誠重要。