「Tián」bōe出ê感情（一）
ChatGPT華語翻譯 （參考而已）
以下ê故事是架空ê，無反映現此時ê政治經濟社會
Chit ê時陣已經是新ê學期ah，宿舍內底逐ê儂lóng已經準備好勢beh歇睏，但是佳玟oân-á佇宿舍ê眠床頂，péng來péng去睏bōe落，月娘ê光照入去窗仔內，引伊思想較早ê往事。
Hit工，伊kap佳玟佇海墘散步，日頭teh-beh落kah海ê另外一爿，就是無儂通kàu ê禁地，沙埔面頂ê遊客mā無真chē，砂石仔mā恬靜無講話，只有海湧一直輕聲hoa-hoa叫。雖bóng是熱天，毋過雙儂soah有講bōe離ê代誌。自最近學習當中拄著ê鹹酸苦澀，以及一寡對貧富差距等等ê看法ê交流。伊只是恬恬聽，佳玟所表達ê，koh微微仔笑。
兩个就按呢無聲無說。
「我有一件真煩惱ê代誌……」
「sèrn mèr sír?（啥代誌？）」
突然，伊行kàu佳玟後壁，雙手對伊ê肩胛頭kā相攬，雙手雖然溫暖，但是伊ê聲音帶著緊張：
「最近，我煩惱一件政治ê代誌，可能會予汝食著風險。」
「總統beh koh換？橫直lóng是kâng姓ê，敢有差？Ha-ha-hah……」
「汝mài koh tèⁿ 毋知ah！我是認真ê，」伊小寡受氣：「語文法koh beh修改ah！」
「我知影lah！有改無改敢有差？」
「伊有規定禁止刊行方言ê著作文獻，包含字典kap輸入法，汝leh行毋知路敢毋是」
「台語就毋是方言ah，」佳玟按呢回答，「何況汝較早mā是kā我相thīn，希望chit ê網站會當一直紡落去。」
「毋koh，我chit-má咧想，若是汝無tī-leh，chit-ê站mā無法度經營，不如就先kā伊收起來，等有機緣chiah按算，好無？」
佳玟無應，只是感覺伊ê手kah伊ê吐氣，是hiah-nī-á溫暖，我就摸伊ê手，實在無想欲想chiah chē ê問題。
只是佳玟無意料，這是伊落尾一改hām我講話。
佳玟本底想欲kā伊講我ê決意，但是佇回應進前，雄雄接著伊ê上悲傷ê「siau-sit」。
佳玟毋知敢是怨恨家己予伊落南kàu我ê家鄉，chiah予伊佇騎o͘-tó͘-bái對車頭轉厝ê時陣拄著不測？抑是怨恨家己bōe赴kā真實ê決定提早訴出來？
就算已經開學，代誌過了個半月ah，佳玟想起著chit位唯一支持我ê同學，伊ê快樂笑聲，以及伊對字典ê建議，以及佇身體都合無拄好ê時陣，kā伊ê安慰，就算毋敢予宿舍ê同伴知，但是佳玟猶原目屎流落來。伊毋知影佇暗暝koh有啥物儂通好講？
佳玟恬靜一tia̍p-á久，最後我予家己落一个決定：
「因為伊無向望我繼續開發，是驚我予警察泡茶，iah是坐監，伊著看bōe著我，毋koh，伊已經轉去ah。
而且che mā是伊向望我支持ê，我若是有伊ê堅心kap支持，我就啥物lóng毋驚ah。」
伊kā鼻仔chhngh-chhngh leh，無攪吵別儂，拍開桌仔頂ê電腦，連入去VPN，看線頂ê字典敢koh有其他意見ê回應。
無意外，iáu是真chē反對in ê儂，除了支持「國語」ê儂以外，mā是有一寡儂the̍h出著in ê漢字建議。
但是，佳玟已經麻痺ah，自chit-ê網站拄開ê時，伊就知影定著有反對ê儂，而且政府可能會chhōe空chhōe縫，所以伊就非常重視按怎進階上網，而且予家己ê個人資料隱密，開發字典ê代誌kan-ta予幾位好朋友知影。
但是佇真chē無意義批內底，伊看見有一个ê批，開伊ê目睭，致使伊好奇：
「From: lisachang42@……com
親愛的『番薯典』開發團隊：
我對這個臺語字典網站有興趣，希望能夠加入開發的行列。我大概只懂一點點臺語的教會羅馬字寫法，但是希望能夠貢獻所長。我目前會開發行動app的程式，以及會前後端的語言如下：……
希望能夠和您們一起貢獻臺語的環境。
Lisa Chang謹啟」