數念兩位故人
（更新日：2026-08-25）
今年有兩位網路頂認捌kap聯絡ê朋友，永永離開tsit ê世間，佇tsia寫對in ê記憶，成做對in ê紀念：
數念Dreamplan2501（無夢星球）
我對無夢星球ê認捌，是對佇前Twitter流連ê時陣熟似。伊是一个出身對浙江ê女畫師，捌佇Pixiv貼伊ê《絕望先生在中國》ê同人作品。伊hit陣對中國ê政治社會有特別ê看法，佇彼系列ê作品內底表達。後來伊捌佇中國（應該是廣東附近，若是無記毋著）教冊。
後來伊移民kàu美國Texas，佇hit pîng教中文，mā歸化做美國公民，佇伊著hit ê病進前，捌做過雞卵糕師傅。因為kah我siâng款，無歡喜Musk佇合併Twitter ê作為，所以kap我lóng走來Mastodon，雖然無kâng服侍器。伊kàu美國猶原關心政治，對Trump表達無認同，mā對韓國ê女性主義發表伊家己ê看法。飼一隻跟tuè伊kàu美國ê柑仔色貓仔，號做「金條」，網頂ê別名號做「三胖」。
我mā hām無夢星球討論著政治、冊、神經多樣性、宗教、歷史相關ê議題以及臺語等等，對伊ê感想是伊是我所認捌ê女性中，上關心政治ê儂，我kàu tann應該tshuē無第二个。對頂年iáu是tsū年下半，因為血液ê症頭，開足tsē錢，koh接受逐款療法，佇病院內底hām症頭tshia拚。伊佇頂年捌講：「一直想去台湾吃小吃旅游，要是有缘等一切结束可以跟你吃个饭」（一直想beh去臺灣食點心kah旅遊，準講有緣，一切收suah了後，通kah汝食飯）。伊ê貓仔mā寄予別lâng飼。
毋過後來，in兜ê貓仔佇舊年底過身，無guā久，伊家己mā自今年年初上尾ê PO文了後，就無消無息。後來知影有lâng佇伊ê Bluesky口座悼念伊——才確認伊應該離開病疼，kap伊ê貓仔相見面ah。
無夢星球佇個人資料頁 (portfolio) 頂寫，伊過往進前，想beh去南極tshit-thô。但是tsit-má想著tsit件代誌，以及伊「有緣來去臺灣」ê回應，心中感覺足複雜——毋甘、悲傷或者是遺憾透濫做伙。
數念JJHuang
JJHuang較早是佇本底ê Twitter熟似，hit陣mā主要是因為kap共同ê朋友做伙佇一寡Telegram群組開講，tsiah熟似互相跟tuè ê前輩。後來我因為緣故停止佇原Twitter鋪推文了後，猶原hām伊佇g0v.social ê Mastodon站討論。伊捷捷分享佇新竹ê生活，以及騎武車kap旅行四海ê outdoor生活。我除了kah伊討論政治、社會新聞以及生活以外，因為伊ê客家背景，我mā捌用客語回應伊。雖罔伊講ê是海陸，毋是我學ê四縣。伊mā kap我讀kâng一間大學，我mā hām伊講著相關ê代誌。
Tsū年年初，我捌因為生活ê代誌，án-ne鋪文：
如果體力不支的時間、運動的時間、工作的時間、不振的意志這樣東扯西扯，很難完成自己想做的事，就變成工作機器了
萬一自己活到退休，還真有可能因為沒有長期業餘事物的習慣結果心理受到衝擊
（若是buē接力ê時間、運動ê時間、工課ê時間、無元氣ê意志án-ne相giú，足oh完成家kī想beh完成ê代誌，就成做工作ê機械
萬不二家己活kah退休，koh誠實有可能因為無長期業外興趣ê慣勢，結果心理著衝擊）
伊kā我應：
那就現在開始兼顧工作與嗜好，還有健康
（A̍h著tsit-má開始兼顧工課kap興趣，以及健康）
JJHuang講ê話的確有道理，後來我mā盡量兼顧tsiah ê。但是佇伊安歇幾個月了後，tsiah知影伊離開ê消息。Tann想著伊，mā是感覺小寡稀微。
另外，伊mā佇世紀
Tann mā只有佇心內想：伊hām我攏受洗過，若是kàu彼日，kám koh會當繼續khǹg佇心肝內底ê討論？
收尾ê話
年歲一下大，就愛面對足tsē儂ê永永離開，tse是逐ê儂lóng愛經歷ê，我所會當做ê，就是將in ê回憶khǹg佇gún心內底，感謝in hām我ê交流，予我有足tsē ê溫暖，繼續向前行。