架設email服侍器失敗

頂禮拜六，因為家己想欲有專門ê電子批管理方式（比如講較tsē電子phue口座，專工做無kâng ê用途），所以一時興趣趣想beh安裝電子phue服侍器。

我所用ê就是Postfix電子批服侍器，以及Dovecot服侍器內部郵件管理器，結果因為Dovecot改版足tsē設定檔ê變數大調整，真tsē ê說明文件攏無反應án-nuá改，直直lòng壁，而且因為設定誠厚工，測試ê環節誠濟，開起碼十點鐘以上，而且頂禮拜六暗暝lóng無睏眠。

結果軟體運作ê測試攏OK ê時陣，mā照GMail期待開SPF ê設定，結果出現一个無塊改ê問題——因為我門口埕機器服侍器ê IP是浮ê (dynamic)，致使Google共我ê IP列做禁止收批ê烏名單。這款代誌我mā無得通處理，毋是換軟體就會當解決ê問題，落尾只好當做「空笑夢，一場風聲」，或者是若《傳道書》作者講，伊行足大ê工程，落尾攏是掠風ê空空。

我認為，GMail為著避免糞埽phue ê問題，伊就用設落足tsē難關予其他紡電子批服侍器ê，來避免遮ê問題，別ê提供者mā因為Google坐大位，袂當無遵趁。但是án-ne就會致kàu馬太效應ê問題——「見若有ê，beh予伊，就伊有tshun；無ê，連伊所有ê，也beh搶伊」。社會風氣若是無得通改變，馬太效應就會自然發生，但是少少儂獨斷ê社會，對tsē-tsē儂顛倒不利。Beh án-nuá解決tsit ê問題，可能就愛有公共管理者tsiah會當，但是我mā毋知影án-ne敢會當。

是講我leh使用ê Fediverse，mā是有tsit號可能ê問題，tsit-má因為用ê儂額（或者是服侍器ê額，下kha kâng款）少，問題無明顯，但是儂額一下tsē，恐驚會有挑戰，就親像一陣儂超過一个數額，就愛用階層制kap成文法律來管理kâng款。