羽典（第一章）
（總紹介）
海湧猶原咧hoa-hoa吼，佇熱天ê尾溜，怨嘆著歇熱ê結束。
佇望夕海墘，已經接近欲暗仔，毋過天色猶未暗落，我一个
想起三個月以來發生ê代誌，除了是無法度用言語講予徹底ê悲傷，嘛是予我吐大氣，因為遮ê代誌相連紲，無咧停，若無擋仔ê自強號，
※ ※ ※
「嘛著是講，除了我ê以外，
「Hehⁿ 啊，阿安，目前欲做這个線頂字典，代先愛有開放原始檔案，毋過嘛愛有網路空間、會曉寫程式ê儂佮數位化。」我應：「網路空間ê部份，我已經揀好這臺外國ê虛主機，所以這馬賰會曉寫程式ê儂。」
「敢是國外ê？」
「當然是美國ê noh！羽安，我袂戇甲……！汝應該嘛知影最近ê新聞hohⁿ？佇阮學校ê BBS面頂有刊。」
「啥物新聞？」
「就是《語文法》最近閣欲重出江湖矣！」我閣吐一口氣。
「汝是講幾冬前，限制佇公共場合佮學校講臺語、客語等等nó͘ -sut ê譀古法律？敢毋是取消矣？」羽安緊張相問。
毋過代誌無遐爾簡單，根據消息來源，政府咧欲推出ê草案，除了進前佇教學、政府機關集會干焦通講國語ê規定閣推以外，嘛真可能包含國內ê字典佮輸入法攏袂當出臺語ê版本，我就趁邊仔確實無儂近倚ê時陣，按呢共解說。
「原來以後這款代誌，嘛有可能真危險」，羽安這時才知代誌ê嚴重性。
「Iā汝敢欲繼續？可能會予戴帽仔ê掠去喔！」我這時略略仔躊躇共伊問。
「頭攏洗落去矣，」羽安ê聲音無大，毋過誠堅定，雖罔減我一歲——這嘛是我上佮意伊ê所在：「因為我ê時代，臺語ê教材佮字典真正少，高中圖書館才揣著一本，這馬線頂ê資源的確無濟，我無向望別儂按呢受苦。」
伊輕輕對後壁共我攬：「若是這塊島嶼逐家干焦講華語，就親像lĕ-bóng雞卵糕無面頂ê，酸酸脆脆ê𠕇殼siâng款，無意無思。」
「就親像咱見面無相攬仝款！」我那笑那應。
佳哉邊仔無啥物儂，若無邊仔ê儂可能會tih-tih-tuh-tuh，就算按呢，海湧猶原熱情共阮ê互動回應。
因為六點矣，日頭已經落海，伊捋我ê頭鬃尾，我kā講：
「汝欲共我鬥寫字典ê程式，真無簡單呢！」
「無啦，只是拄仔好有學著別系ê課，用半桶仔師傅ê技術寫爾爾。」伊àⁿ 頭共我應。
「是講因為汝按呢付出，我的確著多謝汝，有準備禮物，但是囥佇宿舍內底。需要我隨去宿舍共提無？」
「免專工來去遐，我後擺提就好，真多謝！是講這是啥物咧？」
「秘密！」
咱兩儂佇五彩ê彩霞下跤做伙笑咍咍。
但是三個月前ê羽安佮我，煞毋知影以後永永無法度見著禮物相送ê一工。
※ ※ ※
彼工下晡，七月，行出南下ê莒光號，西北雨直直落，目箍紅絳絳，分bōe出目睭邊仔teh流ê，是雨水，抑是我ê目屎。
我對羽安
一下出去高雄車站，佇「效忠領袖，武衛中華」ê ，藍底白字ê khăng-páng下跤，頭前濟濟ê公車舞亂我ê情緒，佇往五甲ê公車頂，khi-khi khoh-khoh中，我想著頭一改伊佇社團當中紹介家己ê自信ê態度，伊後來轉學到T大ê時，嘛不時和我佇BBS頂用水球來開講規半暝ê逐暗、以及到伊想欲予我ê surprise，才kā阮突然提出ê臺語字典ê計畫。
我毋願koh陷入去無塊止ê過去，煞雄雄想起，伊予我ê錄音帶，因為歹記持，只會當茫茫渺渺記得：
「我對伊啥款心情哪會袂明瞭
較講嘛講袂得了……」
落車，褫開雨傘，因為忍袂牢bà-suh ê烏煙，一下咳嗽，mā共家己「掃」入去現實。行到伊ê徛家頭前，因為in兜佇街仔路邊，遠遠就看見細細ê藍色塑膠棚仔。誠實毋願看頭前ê，捌熟似，反轉變做生分ê相。棚仔內底無別个儂客，只有兩三位假若是in親情ê，佇燒熱ê天氣中恬恬仔拗紙蓮花。當我那行那倚ê時陣，突然一位年紀和我相親像ê女子，越頭過來……
羽安閣活佇我ê面前？我強欲喝伊ê名ê時，忽然伊問：
「 汝是羽安的同學嗎？」
「我是她的朋友，嘛是她大學一年ê仝學校ê同學。」面對一个和伊siâng款，卻是假若較無遐捷用臺語ê「伊」，誠實微妙，雖然我大概知影伊ê身份。
伊家己紹介是小妹羽柔，佮伊ê大姊相比，伊原仔略略仔較矮一寡，但是伊ê面形佮喙唇，猶原是彼个儂ê形影。佇交談中，我想著進前羽安所講，有一个雙生仔小妹，佮語言比起來，伊較佮意電腦程式，嘛讀阮學校附近ê大學。
我到今猶是想袂曉，哪會有儂對電腦ê英語代號佮數學ê記號遮有興趣，我真佩服伊會當坐佇電腦前，無和別儂，干焦佮無生活ê實際意義ê符號對相。閣我想起in大姊ê熱情，我ê目箍毋知何時閣拑牢目屎，落尾猶是流落。
最後，羽柔和我講：多謝雅婷佇北部ê時陣，對大姊ê照顧。
彼時，誠想欲，想欲閣看著，雖然無仝煞相siâng ê形影，強強欲訴出：「我想欲佮汝交換電子批地址」。
但是現實猶原硩牢我ê心。
閣硩這句話佇心肝底。
深深ê思念綴我轉去，這一切已經予時間ê溪仔水，流甲看袂清ê彼爿。按下ê聲音雖然直直kā我講，毋過伊分我ê飲料、逐暗ê心事，攏佇我ê心肝頭發酵——
成做這片海水ê鹹味佮無言ê海埔沙仔。
聽著海水ê聲，那來那恬靜，天色染五彩，展出伊ê燦爛，但是我心內誠平靜，嘛突然想起伊和我講ê話：
「失去ê，攏會成做天頂ê星，陪汝佇烏暗中行。」
或者伊所思思念念ê字典，是伊意愛我著行ê路？我誠實毋知影。
我這時毋知影未來會怎樣行，總是姑不而將，就算落尾夢一場，就算政府ê共我鎖定，橫直有天頂ê星共我顧守，敢毋是？
暗時因為起風，微微仔寒。入去學校ê計算機中心，就隨佇BDD這个BBS，PO文徵求處理字典ê程式義工。
起初，嘛是有儂憢疑、供體，攏總用華語：
「閩南語有音無字，欲按怎有字典？」
「逐家攏講國語，無較縒啦，白了工！」
遮ê倒剾正削，我當然會當理解，毋過敢有別儂願意贊聲？拜託拜託……
雖然向望就算是一句相伨ê嘛好，BBS站內批猶是無收著別儂願意幫贊。一工一工，我嘛毋知天頂ê星敢真正袂無去。
已經過了一禮拜，當我想欲登入BBS，刣掉這篇ê時，我收著新ê批，按呢講：
「（我台語
Theng 你好，我是helenchen，
我對你
我會曉Perl，應該會當協助你ㄟ介面。
我ㄟemail是……
Helen Chen」
突然，我看見學校ê路樹，風無閣搖振動矣，佇拄仔入秋天ê暗暝。
（後章）