羽典（第十四章）

（頂章）

肅殺無聲ê警備指揮部（我嘛無確定敢是），雖罔佮會當喘氣ê外圍，干焦隔一塊牽鐵線網ê壁，但實際比星辰閣較遠。

已經毋知影幾點鐘，可能是十幾點鐘，毋過斟酌想嘛無意義，連日時暗暝攏毋知。這个狹kheh兩三坪ê間仔，無水，無食物，無時鐘，無出入ê希望，嘛無窗仔佮日光，只有兩个共阮苦刑ê查埔軍人。彼葩永永袂關，顛倒那來那大葩、那來那光ê電火胿仔，以及袂當控制家己咧想，毋知影in閣會對阮怎樣粗殘ê恐怖，不斷共我ê靈魂蒸發、搖掣甲毋成型。

閣想起一本小說所講ê「咱會佇無烏暗ê所在相見」，這馬才知影伊真正ê意思，毋過已經無氣力閣想矣——我感覺理智已經佇失去時間、無食、無啉、無睏佮喝罵聲，漸漸對身軀剝開，足驚會剝甲啥物款ê程度。就算猶原出全力堅持。

「國家栽培妳們到這麼大，竟然搞叛亂，不知羞恥！」

「阮只是咧做……語言學ê……研究。」我tí-tí-tuh-tuh，勉強對嚨喉吐出幾个音……

Phiak！我ê喙䫌閣食一个搧拍，薟閣紅kì-kì：

「語言學研究，掛羊頭賣狗肉的事我看得很多，少騙我！」

「潘雅婷，妳也替妳的『好同夥』說幾句好話嘛！」另外一个軍人用輕phiò ê氣口對雅婷講。

「我聽無……國語啦……！」雅婷猶原堅決，無愛共正面應，就算伊ê聲已經無啥物氣力，伊ê面已經hŏng拍甲紅佮欲流血矣。

「都讀到大學了，還聽不懂！要我講幾次？」彼个軍人ê五官結規丸，搝伊ê頭毛，然後大力向壁角仔幌，共伊摔倒，烏青ê伊，干焦流目屎，猶原無出聲。

我干焦用驚惶閣無神ê目睭共伊看，理智想講應該愛應眼神相伨，毋過自腹肚到雙跤，規組身體反轉毋是家己ê。

這時，有一个穿甲誠整齊ê土色制服ê女軍官過來，提兩杯茶囥佇阮面前，對彼兩位軍人講：

「你們這樣問，她們當然不會招供啊！」

雖罔感覺是好意，但是我心內嘛點仔懷疑，伊敢毋是面笑腹藏劍ê儂——雖然對伊送茶ê時，無張持展現ê眼神，假若說明出答案。

「恁嘛是想講為著中華文化ê保留才努力，偏偏行毋知路……」伊煞用阮ê語言講。我雖然憢疑伊ê目的，但是這時我開始感覺無力通質疑，我ê腹肚對我抗議，連伊咧講啥物都開始無法度注神矣。

「若是這馬恁會當坦白，嘛是毋免關遐久，我會當共恁爭取……曷無，地獄的苦頭就有妳們受了！」

毋通予伊騙！雅婷，汝應該知影hohⁿ，伊ê嘴內底有毒蛇ê喙齒！

「我無掛意啥物中華文化，干焦想欲保存爸母話爾爾，按呢嘛毋通？」雅婷總算過毋知偌久ê時間，開始開喙出聲。規間審訊間雄雄恬靜幾秒鐘。

佇邊仔ê軍人咧欲和伊諍ê時，女軍官指手勢共擋咧，冷冷講，假若一支利劍：

「爸母話？汝攏無考慮著恁爸母ê前途，閣有面皮講爸母？」伊越頭講ê時陣，一个查埔軍人就照進前伊所指示ê行過來，鞋仔khok、khok、khok ê聲迴響佇眾儂ê耳空，假若直直響，袂收煞。伊共三件證物提出來——

就是面頂寫《自由台文》ê 3.5磁片、印出來ê săm-phú-luh佮我ê錄音機。我偷偷仔影著雅婷ê面，煞變做青恂恂。而且毋知影錄音帶內底有啥物奇怪ê聲音，我ê心肝mā phī-pho̍k-chháiⁿ。

「加密了後著共原始檔案刣予乾淨，閣毋是小學生！」彼个軍官那奸臣仔笑，那讀印出來ê證據：「刺殺先總統ê詩、史明ê冊ê譯選，hm……有儂干焦有史明ê mè-chì就坐監十年，恁按呢猶就判幾年？

而且雅婷啊，恁老母咧學校教冊，咧欲退休，汝應該無向望伊領無退休金，轉去食家己，閣留歹名聲hohⁿ？煞毋免講有做兵ê小弟……」

夭壽喔！雅婷，汝哪會無共文字刣予清氣？應該著予我知影啊！

「其實這是阮無張持，烏白提著海外ê儂……所送無清氣ê文章，阮按算共內底ê無正確ê內容刣掉才PO出去。」雅婷用伊佇虛lè-lè ê程度，硬出誠大ê氣力，按呢解說。

「Hehⁿ啊，遮ê是海外ê歹儂寄予我ê，毋是寄予伊，我無細膩才共磁片囥佇雅婷ê包包內底，欲罰就共我罰。」我食力毋過慢慢仔接話，雅婷ê眼睭煞驚著，毋閣嘛略仔感動。

這時我心內有真大ê chhong-pōng想beh用「ài」來解救，就算靈魂已經欲和我ê身軀強欲脫離，手假若無得通振動ah。雖然按呢擔罪ê講法的確誠魯，嘛的確誠礙虐，但是毋願看見伊ê堅持，予伊佮伊ê親儂白白受苦，橫直阮爸母無teh食國家飯，taⁿ我嘛無兄弟姊妹，若我hŏng關應該袂有遐大犧牲。希望上天會當賞賜奇蹟……

毋過軍官干焦冷笑，講：「事到如今，汝閣想欲替姊妹仔伴擔罪？好好看看自己啥德性！」伊提出錄音機，講，就算聽起來提含含糊糊：「汝毋是捌提黨證去教官室，講欲滲透入去臺語ê字典專案？」

這時，雅婷才雄雄知捌著上尾、上大ê謎團，gông-gia̍h刻佇伊ê面。竟然這个上大ê秘密佇上袂堪得ê時陣煏空，我驚甲大舌：「無，這臺錄音機……是雅婷……予我ê……禮物，我無提……這共伊監聽。」

「真的？」軍官無加講啥，干焦共錄音機拍開，彼是雅婷ê聲，雖罔有樹葉仔sa-sa叫，反轉閣較清楚：「若是一代一代攏按呢，按怎進步？總是向望咱變做自由ê儂……」

敢毋是彼工佇L庄山崙開講ê錄音，我哪會佇遐錄著遮ê聲……我驚甲àⁿ頭毋敢共in看。

「羽柔，夯頭啦，汝替黨國做一件好代誌咧！敢講中華民國taⁿ是無自由ê？Che就是雅婷ê罪證！」伊閣用若利劍ê話刺插我ê心：

「犯罪ê證物干焦佇雅婷遐，根據阮對汝ê追蹤，猶chhiau無汝ê犯罪嫌疑，乖乖配合就會當自由。

毋過若是汝閣硬欲擔伊著食ê罪，伊ê罪嘛袂變輕——磁片ê指頭仔痕ê記錄清清楚楚，袂像汝講白賊！而且汝若毋承認是透仔，阮會共『知匪不報』送予汝，予汝ê跤手袂當自由離開遮，而且恁爸母ê店……」伊無用喝ê，煞字字入骨，予我ê心流血流滴。

突然間，內底「thiàⁿ」、「ài」、守護、友誼，甚至昨昏暗ê親密，以及指頭仔ê溫暖，攏跟綴我愈來愈衰荏ê氣力滅無，焦慮、失去ê青春、長久ê苦刑、爸母ê店——In干焦只賰我一个囝、親人ê看法，以及對未來ê前途ê憂悶走入來，共我ê心志拆甲碎糊糊，我規身軀ê細胞干焦咧四界喝自由、自由、自由，反背我ê意志，對嚨喉敨出來——

「好啦！

我真的是線民，單純只想滲透計劃！

一切罪過都在雅婷，跟我無關！」

我強欲吼出來，用上尾ê氣力。而且攏用國語。

眼前因為同時流ê目屎茫茫無明，毋敢直接相雅婷。

毋過我佇影著伊ê時——干焦一秒鐘，伊心碎、gāng去、驚惶——毋是因為審問，卻目睭全然失去光彩，目睭仁帶著極大ê怨恨。

仝時，我看見「thiàⁿ」kap「ài」hit兩字，佇遠遠ê所在，已經予這葩電火胿仔ê光燒燒去。

（後章）