羽典（第十三章）

（頂章）

冷冷ê風、卡雺ê山、一臺o͘-tó͘-bái、兩个查某囡仔。

「所以，這馬in已經知影咱ê行蹤矣？」我問。

「根據我ê了解，in已經共咱ê詳細攏知影甲一清二楚，照按呢落去，搝網只是早慢ê代誌。」羽柔講。

「汝是按怎知ê？」我誠實真好奇，伊無應該是教官室ê透仔，毋過伊哪會遐知影教官室ê動態？伊的確是誠神祕ê儂——毋過引我那來那好奇，我誠實想欲知影閣較濟伊ê代誌！

毋過伊猶原專心駛車，恬靜猶原佇阮兩儂中間，干焦iăn-jín聲共我回應，佇南下ê路途。

無偌久，我看見一个分叉路口，叫伊斡向海墘ê小路。這條路無車行過，只有略仔漚去ê「望夕海灘」柴khăng-páng，以及搖動ê木麻黃迎接阮。羽柔共我問：「為啥物汝欲𤆬我來遮？」

「汝等一下就知影囉。」我刁工共伊刁。

羽柔佇路尾停車了後，我向前行，羽柔假若毋知影啥事ê囡仔綴佇後壁。因為冬天傷寒，sih-sih顫，干焦阮兩儂，佇闊闊ê沙埔，大港ê海湧直直向阮這爿拍過來。這時伊大聲問，雖罔湧ê聲強欲崁掉伊所喝ê：

「汝是按怎𤆬我來遮看海湧？」

「遮是我佮羽安上尾改相見ê所在，彼時伊嘛鼓勵我共字典專案行落去。羽安轉學到臺北了後，阮定定來遮看日落。」我假若通看見羽安共我攬ê情景，以及伊堅定ê聲音。毋知影in小妹有感覺無？

這時羽柔ê頭毛吹甲亂去，我就共伊ê頭毛抾予順——雖然隨時就會閣走形，嘛無要緊。伊只是恬恬予我共伊ê頭毛搝予直，看著沙埔ê沙仔咧飛，烏雲咧走，以及感受著我ê指頭仔。

「有儂講，『社會生存ê本質，無適合阮』，汝感覺咧？」羽柔ê這句話，拍碎雙儂佇海水聲中ê恬靜。

「的確taⁿ無適合，」我àⁿ頭思考，突然想出一句話，用我ê堅心講：「毋過總有一工，總是會改變，會出貓霧光，一定會有。」

「這本月刊內底ê作者，in ê理想嘛會當看見日頭？」羽柔無死心，硞硞問。

「寒冬總會收煞，就迎接春天。」我那掰掉羽柔目眉頂ê風沙，那向望咱兩儂通相佮看見出日頭ê時陣。

這時東北季風愈來愈透，閣開始咧落毛毛仔雨。

※ ※ ※

暗暝，C縣市街ê旅社，規間房間內雖然算是清氣，但是透著淡薄仔臭殕味，外口ê車siù-siù叫，假若回應我ê心事。到底阮流亡天涯，著愛到啥物時陣？無儂通好講，只有羽柔一个儂陪我。

我若是hŏng掠，欲按怎面對叫我莫插政治ê老母？而且小弟猶閣咧做兵，in兩儂有可能會予我連累。但是我敢毋是一下做遮ê代誌，以及提月刊ê見本（應該有加密hohⁿ），著愛知面對後果？我哪會這時才咧想遮ê問題。這馬羽柔伊ê心內嘛毋知影欲按怎才好，若是和伊講，會予伊ê心情崩去……

千言萬語，干焦換做一句：「羽柔，汝先洗身軀。」

伊洗好了後，我行入去洗身軀間，褪掉一工ê走傱，拍開水道頭，聽著蓮花頭出來ê「phi-li phi-li」聲，感覺一切攏歸佇恬靜，心肝頭略略仔扞予在。

毋知影伊一工ê忝，敢會當暫時消敨？伊雖然駛o͘-tó͘-bái駛甲足穩，但是毋知影伊心肝頭敢有遐爾穩定？我誠實希望伊通共伊ê不安對我講，就像親身感覺著水ê溫度仝款，就算講會燒著我，或者是冷著我。毋過欲按怎講起？

這時突然我感覺熱水ê溫度勻勻仔變懸，心內底嘛有點仔浮浮無定，感覺足想欲感覺伊當咧想啥物，知影真實ê秘密——就算講會鑿著我，我嘛甘願——甚至我ê靈魂想欲莫有身軀ê阻隔，直接貼佇羽柔ê靈魂，感受伊ê頻率，嘛仝調回應。

Kā衫穿好，我行向坐佇雙儂床邊仔ê伊，羽柔共我問：

「汝按算欲按怎做，臺灣傷細，無法度一直走閃。」伊ê目睭閃爍，展出誠大ê操煩佮無助。

「無法度，嘛只會當明仔載到街仔ê派出所，共代誌說予明……」我的確無步矣，遮ê代誌總是愛說明，嘛毋知影這敢會安慰著。

「共我攬牢牢。」羽柔用囡仔款ê聲共我求，以早攏無按呢啊……

「？」我懷疑，敢講taⁿ咱雙儂ê關係好甲會當按呢？

「我進前就知影汝佮我大姊ê關係，汝應該嘛有攬過hohⁿ？就按呢。」我想欲澄清ê時陣，伊紲講：

「而且我足驚ê……，汝共我攬好無？拜託……」羽柔目箍假若欲紅起來矣。

「惜惜喔……」我雖然嘛會驚惶，手略略仔掣，猶原輕輕仔共雙手囥佇伊ê腰——雖罔體格小寡無仝，毋閣嘛用對「彼个伊」熟似ê方法佮情感，慢慢仔共「頭前ê伊」攬牢牢。

「無代誌，有我佇咧。」我輕聲講，閣勻勻仔共伊ê尻脊骿挲捋，偌爾溫純，偌爾柔和。

佇伊ê溫暖、幼秀，以及拄洗好ê清芳中，彼兩字閣寬寬仔浮現佇我ê目睭前，親像佇伊食格仔餅，我共伊弄ê時——毋過到底是「thiàⁿ」或者是「ài」？管他伊遐濟，我嘛毋願思考，佇如如不變ê瞬間。

獨獨想欲守護伊ê笑容、吐氣聲、車聲中ê寂靜、這馬ê逐分逐秒，佮只有咱兩儂ê所在。

※ ※ ※

天色烏暗，連貓霧光都猶未出現。

我慢慢仔起床，看著伊亂操操ê頭毛，想起伊ê頷頸ê溫暖，以及幼軟軟閣靈巧ê chéng-cháiⁿ。伊應該嘛是佇眠夢中，數念我耳仔邊ê芳味，以及我面ê紅霓佮倒手爿ê咖啡色胎記——佇這个暗暝，阮兩儂ê心貼心。伊ê喙唇閣帶微微仔笑，我若是有翕相機，誠實想欲共伊ê笑面收藏起來，收囥佇我ê記憶上深ê所在。

毋閣我猶原kā伊搖醒，伊對夢鄉行入去現實，講：「汝物件有收好矣未？」

「攏收好啊，猶是我共汝鬥收？」我佯做昨昏暗啥代誌攏無發生，包含我ê翩翩想像。

「我來收就好。」伊收轉去囡仔款ê聲調，猶原小寡閉思。

看著眼前咧整理ê羽柔，我瞬間感覺，伊雖然和羽安無仝款，一个內向，一个有自信。但是看著羽柔學臺語ê心、關鍵時間救我ê決斷，以及願意忍受我ê堅持，猶原做伙行ê行動，我想，伊的確是比羽安閣較羽安。

就算自首，嘛著仝齊自首，做伙來扛，因為佇荒埔內底，只有阮兩儂，會當相依倚。

我決意欲和伊表白，出聲ê時，聲調咧掣，無法度控制：

「其實，我……」

PONG！PONG！PONG！

Chàn門ê聲裂破四點半ê街頭。

「開門！」「開門！」

佇阮雙儂猶未反應ê時，房間ê柴門，予幾位穿制服ê軍人chàn開，chŏh入去，我ê心結規虯。

雖然早知臺灣傷細，煞毋知影彼時遐緊到。

佇我失去記憶進前，干焦看見足濟支軍用手電ê白光，道道貫入我佮伊ê心臟。

（後章）