羽典（第十五章）
（頂章）
彼工，是我上尾改看見伊ê日。
我已經無法度想詳細，彼陣按怎離開無底ê深淵，干焦了解，佇出大門ê時，雖然我ê雙手無受束縛，但是迎接我ê毋是通小寡喘氣ê，相對較自由ê空間，煞是無底、予儂袂喘氣ê苦刑ê，彎曲閣狹kheh ê小路。重hoâiⁿ-hoâiⁿ ê大支柴枷，硩佇我ê頷仔頸，予我干焦會當蹁蹁仔行，一世儂無法度敨開——因為伊失神、慼心，koh kâⁿ苦恨ê目睭，已經宣判我ê刑期。
雖然我遐幾個月佇教官室，盡力無詳細透露伊ê個人情報，連伊ê本名、服侍器ê IP都無共教官講明，而且家己後來嘛知影家己行歪chhoa̍h，彼時確實無做出對不起伊ê代誌。只是「一切罪過都在雅婷！」，猶原佇每个半暝，佇我ê頭殼內底大聲回音，siâng時會看見逐个音若銃子，貫過伊ê身軀，逐个空喙濺出大港細港紅kì-kì ê血，予我驚醒，面上帶兩逝目屎。是按怎彼工，上尾ê坎站，無法度阻擋我ê喙，講出這款痟話？我誠毋成樣！
見若醒去，我就厭恨家己，但是閣較濟痛悔，嘛無得通予伊提早自由一分半秒，iā無法度予家己仝齊扛幾ā年ê苦難。
出來了後我kho̍k-kho̍k搜揣羽典ê關係人，欲探聽雅婷ê下落，結果原底提《自由台文》予雅婷ê Peter，有讀無應；Alex伊mā佇美國無閒研究所ê代誌，嘛毋知影伊ê狀況，干焦感覺誠遺憾、誠艱苦。講著育誠，假若一直走閃，我佇伊上課ê系館攏無拄著，隔年歇熱閣聽講伊轉學矣——到底是按怎，應該是有故事，但是追究，嘛無較縒矣。
彼个線頂字典專案嘛因為自頭到尾，無儂接手——特別是佇這款烏烏暗暗ê氛圍——干焦死死停佇beta版，然後因為服侍器空間無法度紲約，就淹密佇網路ê洪流，佮大姊相會矣。
大姊定定講：「失去ê，lóng會成做天頂ê星，陪汝佇烏暗中行」，毋過天色猶原是無星、無月、無光。我心內感覺足怨慼，攏因為我ê糊塗，一切就成做一場夢，而且這場惡夢猶原罩佇兩儂之間，直直袂散。雅婷啊，汝到底佇佗位……
「學姊！這是老師買ê格仔餅，專工對K大內底，足烘ê店買ê喔！為著欲感謝咱逐家田野調查ê辛勞！敢欲食無？」研究所ê學妹，帶著笑神，捾一大包格仔餅，共我對回想中叫醒。總是阮研究團隊佇考查語言學文獻，去庄跤佮部落規禮拜錄音，整理檔案，逐家轉來攏足忝ê，需要一寡止枵ê物。格仔餅的確烘甲赤赤，猶原是芳kòng-kòng。
「毋免啦，我猶足飽neh！」
「誠實無愛？這老師請ê……」學妹感覺誠失望，因為我四常袂拒絕老師同學送ê食物。
「真ê啦，我閣咧控制體重咧！是講，我臨時閣有其他代誌，遐ê標音作業會佇宿舍做，明仔載透早十點進前會完成。先來轉矣，byebye！」我激做啥代誌攏無發生，就揹殕色ê khă-báng，和in微微仔笑告辭。
我自出來到taⁿ，格仔餅我連一喙嘛都無食過矣。
行出研究大樓ê時陣，東北風猶原吹過我ê頭毛，毋過已經袂遐予儂頭殼疼，因為閣一个春天已經欲到矣。但是汝佇監獄內底放風ê時陣，敢有法度感受會著？我向山仔跤ê宿舍行，遠方ê夕陽予西爿ê山崙閣較五彩，汝敢閣會記得彼當陣ê畫面？
我無趁父母ê期待，去讀資工所，專攻網路通信，反轉佇in ê懷疑聲中，揀讀C大這間研究所，若毋是因為汝，就是講白賊。毋過毋但按呢，我佇揀碩士班ê時咧眠夢，會當聽見各地、各語言、各腔口ê逐个母語者所出ê聲，若一蕊一蕊咱彼工佇深山看著ê花，然後共in ê種籽收予好勢。等待時機若到，真正ê春天行入去這塊島嶼ê時，予遐个籽佇用心顧守中釘根、發芽、大欉，直到開花。然後，當希望ê彼工來到ê時，咱會當看見天ni̍h ê貓霧仔光。是講，這馬攏已經用mp3錄音器錄音，我袂閣犯遮ê低級ê錯誤矣；彼本車輪ê細本簿仔，我嘛偷偷仔棄捒掉，毋過我會等甲汝轉來ê時，才講。
過了足久，千辛萬苦才chhiau著汝佇佗位。梘尾、七年外。
我心內誠思念汝，嘛想欲共代誌說予明，澄清一寡誤會。自兩年前，就逐兩個月攏寫批予汝，共歹勢、懺悔、近況攏對汝講。毋過就算講我無寫半字違禁ê內容，猶原若石頭擲入去宇宙無邊無盡ê烏空，到今收袂著汝半封。敢講是當局認為傷過敏感，禁止接收對外通信？抑是汝予儂徙到別間監所矣？或者是汝猶原怨恨我，無愛共我應一字半句？雖罔我心內嘛誠疑惑，但是直覺假若佇霧霧中予我答案，只是我無願意面對。
我行入去宿舍，管理ê大姊看著我就講：「汝有一封批，是臺北潘雅婷小姐寄來ê，應該是頭一改neh。」
雅婷？佇過三四冬了後，有影寄批予我？
我說多謝，接這封白色ê批信，確實是伊寫ê字，只是略略仔潦草，我一改閣一改用手摸批囊頂ê字痕，感受著伊寫遮ê文字ê處境——佇狹櫼櫼ê牢房內底，用筆一字一字佇壁堵刻出來——我目箍漸漸紅，心內誠感激，嘛感覺足歹勢，予伊專工寫。
到底伊足長久以來對我ê心情，變做啥款？伊佇櫳仔內ê生活，敢有平安無？我感覺忐忑不安，手嘛略略仔掣，雖然有一微微仔無愛面對現實ê矛盾，但是心內足想欲，足想欲讀，過了遮濟春夏秋冬neh……
我轉去我ê房間，共批囊佮揹仔囥落，坐予正，慎重用美工刀共批ê邊仔liô一巡，輕輕抽出內底白色紅框仔ê八逝紙，慢慢仔掀開來讀……
「Uh-ah！Uh……Hm……Uh……！」
我ê鼻仔「sngh、sngh」咧吸鼻水，兩逝目屎大滴細滴滴佇批紙頂，逐位宿舍仔伴攏注目我彼爿，想欲共我關心。
予目屎tò͘甲糊去ê批紙，筆跡hoáⁿ-hoáⁿ仔寫講：
「就算退一萬步，假使妳真正無做這款代誌，傷害也永永未原全！」
（後章）