羽典（第二章）
（頂章）
這馬時間已經到秋天矣，毋過中晝透燒熱，猶是像火燒埔，佇學校ê中央道路兩爿，樹椏跟綴東北風幌來幌去，葉仔互相chhi-bú-chhi̍h-chhū，毋知影咧講啥物祕密。
一个揹殕色ê kha-báng女大學生，帶著憢疑佮phut-phut跳ê心，對計算機中心行出來。
三點鐘進前，拜六透早十點，計算機中心無啥物儂，有儂提電腦來看論文，嘛是有儂和別儂毋知是破豆或者是相諍，激動佇BBS頂敲字。
伊佇約好ê時間，拍開BBS，頭一个水球是講：
「Theng: 考慮著逐家ê安全，就用Conexion通信軟體來開講，佇遮download（免安裝）：……。Dor來chhāi樓梯上網，download佇遮：……」
伊一面深深閣略仔微妙笑一聲，原來嘛會驚矣，猶原照所指示ê做。一下拍開：
「Theng：汝有佇咧無？
Helen：是我啦。
Helen：是講，你
Theng：敢真正少儂用？
Helen：ㄇㄚ只有學術研究
Theng：汝嘛大學生？
Helen：嘿啊，讀二年級。
Theng：我是三年。
Helen：利用大學期間有閒做，真
Theng：是講，汝哪會想欲加入
伊心肝頭掣一下，後悔哪會無適當ê理由編。
通常會加入這个專案ê，著愛有適當ê理由，若無對臺語有接觸甚至對伊痴迷，正常儂袂做這號代誌。
早知就毋好一下佇BDD看見PO文，就雄雄落決定欲按呢做矣！伊突然後悔，嘛感覺家己真見笑。
突然，伊想著以早ê往事，煞突然有靈感：
「其實我以早就有對臺語有興趣，我高中ㄟ時陣，
伊那寫，那想起大姊佇高中ê時陣，因為真佮意臺語，受著厝邊長老會ê儂介紹，去綴牧師學教會羅馬字。伊嘛予大姊半唌半勸，彼時嘛淡薄仔好奇，趁伊來去。但是因為臺語無好，閣伊對變調規則無熟似，所以落尾留落來ê是不得已退出ê無奈，iā加添臺語蓋困難ê印象。
拍落遮ê文字，痛苦ê回憶以及家己ê假仙浸佇伊ê心內，伊略仔怨恨家己，毋過毋知影怨恨佗位，是家己袂曉臺語、或者是家己昨昏暗ê決定？總是伊想無。
了後，Theng回應：
「我真欣賞汝有這粒心。因為這馬猶無儂咧做臺語ê線頂字典。
汝是我看著真趣味ê儂——佇chit世間，除了汝以外，我干焦看著另外一个。」
伊感覺心內有一點仔振動：「真趣味？是按怎Theng按呢共我講？」
雖罔伊ê理智咧想，可能是這馬確實無儂咧做臺語線頂字典，伊才按呢共我鼓勵。但是Theng哪會對拄熟似ê生分儂按呢講，伊怎樣想攏想無。伊嘛開始咧懷疑，敢欲繼續做這件代誌？疑惑愈來愈大……
「毋過這馬毋是gōng-gia̍h佇遐ê時陣。應該著愛了解一寡計畫ê詳細」，伊落尾總算共心頭扞予定。
後來，伊漸漸仔知Theng ê 計畫：就是因為版權問題，就代先共對外國大學掃做PDF ê英語—廈門話字典，用人工方法key入去Excel，而且共英語條目部份翻譯做華語，轉做資料庫，了後閣做一个搜揣ê系統網站。伊負責ê就是後半ê人工輸入，以及寫網站。
In兩个講欲煞ê時，Theng和伊講：
「汝敢會當替我做一件代誌？」
「
「用白話字寫臺語，kā汝毋知影beh按怎用漢字寫ê用he寫。」
敢真正欲用學無成功ê書寫系統來寫？伊開始躊躇：
「毋過我真
「我記得徐金松有出《中國閩南廈門音字典》，汝會當chhōe，但是可能著去臺北重慶南路ê冊店看覓。另外輸入法是踮美國ê臺語lâng寫ê，佇chia：……」
伊想著一句話，對佗位跋倒，就對彼位peh起來。而且無按呢做，「彼个」代誌嘛無可能成。
伊決斷若有時間，就坐國光號去臺北一逝看覓。
共電腦關掉，伊那整理一寡重點佇簿仔頂，那想Theng講ê話：
「汝是我看著真趣味ê儂」，伊感覺心適，但是理智阻止伊莫按呢想——閣有真重要ê代誌著做。
冊包整理好勢，無行向租ê厝，反轉行向公車牌仔邊ê行政大樓，彼棟大樓猶原是冰冷，看著經過ê學生和教授。
伊心內猶原咧想，Theng共我掠做是一个趣味ê儂，按呢做，「敢袂做甲傷超過」？跤步煞沓沓仔停一下，但是迎接伊ê是決意做這件代誌ê烏雲，閣罩佇伊ê心肝面頂。
※ ※ ※
彼工伊才一歲，因為老爸是行船儂，所以伊和雙生仔大姊予in媽媽佮阿媽相照顧，有當時仔店面無閒chhih-chhah ê時陣，往往一个儂就顧佇一雙搖籃ê嬰仔，另外个就愛隨時招待儂客。
這款ê生活雖罔無閒，但是猶原會當相扶持罔過日，直到一陣寒流予天氣反冷。
連殕仔光攏猶未展現ê一透早，拄對美國轉來高雄港ê老爸，聽著便所有倒去ê聲，叫醒上大ê不安，就算講用上緊ê速度送去病院，只有袂閣燒烙ê肢體甲佮未倒轉ê運命。
面對這款ê大地動，雖然in阿爸是偌毋甘，但是in才拄揹貸款買這間店面兼徛家，重擔嘛無得通予爸母其中一个辭掉頭路，老母嘛無法度siâng時那顧店那照顧兩个。其中一个著送予阿姑照顧，直到三四歲。
因為伊較溫順，較好安搭，是落尾ê選擇。
偏偏阿姑in自初中出業，就去臺北拍拚，姑丈嘛無啥會曉臺語，伊和伊ê表妹咧耍ê時陣，嘛袂使用。命運ê分叉就按呢開始。
起初伊對「阿公」、「阿媽」等等ê有反應，毋過那來那袂對較深ê語詞有反應，落尾當伊四歲正式轉去高雄，老爸嘛起船，改途未久ê某一工：
「共冊包仔提來遮，明仔載欲去幼稚園矣」
結果伊干焦憢疑，略仔生分毋知，恬恬佇遮，無振無動。
二十秒鐘了後，老爸略仔擋袂牢：「我毋是共汝講，冊包仔佇遐，愛提來？無，我提秀梳仔出來。」
無辜甲強欲哮ê聲微微仔出來：「這明明是『書包』，『冊包仔』我聽無啦！」
老爸和老母對相，「害矣」寫佇表情，特別是對佇南部開店ê一家伙。但是已經袂赴矣，憂頭結面嘛無較縒。
年紀較大ê時，起初伊爸母閣有予伊佇歇熱佮歇寒ê時陣顧店，毋過來去店ni̍h ê儂客攏用臺語問，伊雖然聽有意思，但是因為誠實無輾轉，毋是干焦用華語應，就是講話tih-tih tuh-tuh，無啥物改善。
儂客嘛捷捷講：「恁查某囝哪會是外省儂？在地ê上無嘛會曉講臺語幾若句。」「汝猶是用國語和我講，就會用得。」
伊心內底有一日一日ê怨嘆佮見笑，若是彼時會當叫老爸莫繼續行船，就毋免送伊到臺北，毋免受遮ê苦楚矣？若是伊會當繼續踮佇臺北，無佇高雄，按呢敢會自由？雖罔後來因為這个緣故，伊就干焦負責開關店門佮收拾，會當專心佇讀冊頂，而且因此對儂講ê語言無啥物興趣，顛倒提數學符號佮算式，當做走閃ê出口。
有一工，伊佇國中ê時陣，看見學校講「方言」著罰徛ê同學，雖然認為按呢也敢傷超過，卻是這位永永ê異鄉儂，心內浮一个想法：
若是中華民國攏講siâng款ê語言，就袂有儂區別汝我，就無有對立，嘛就袂有這款ê悲劇，逐家會閣和。
若是這个字典ê主事者Theng，通予in掠著，就會較少儂想欲學區別汝我ê，家己ê不幸就袂閣佇別儂發生。就算Theng真正共我掠做是一个特別有意思ê，但是伊的確是做毋著代誌，按呢區別對這馬面對共匪ê威脅，干焦對阮國家不利爾爾。若是Theng以後做啥物其他破壞團結ê代誌，對伊家己嘛無好，所以按呢做，應該嘛袂傷超過。
延紲到遮，突然有儂共喝，中氣飽足，穿著淺綠色ê制服，整齊閣帶著共通儂割做雙爿ê，熨好ê巡。
「嘿，羽柔，妳愣在那裡作啥？」
「馬教官，我有事情要和你說」
羽柔無越頭，佮教官做伙入去教官室，手中閣捏牢藍色ê簿仔，封面有一箍車輪。
（後章）