羽典（第三章）
（頂章）
「臺北站到了！
臺北站到矣！」
國光號ê司機提mái-khuh提醒車頂ê儂，嘛予坐倚窗仔ê羽柔掣一趒，伊頭拄仔除了佇車頂咧想資料結構ê紅烏樹欲按怎轉換，猶咧思考敢真正欲買字典這个問題。
那看地圖，那迒過天橋，行過忠孝西路，伊到重慶南路倒斡。雖罔是秋天，猶原佇大樓ê林仔下跤，燒氣佮假若佇咧ê雲煙，猶原浮佇路ni̍h，成做儂儂心肝頭ê齷齪。
遮和S城無仝，亭仔跤ê儂蓋濟，來來去去，毋知影in按佗位來，向佗位去，凡勢伊嘛毋知影，伊佮Theng是按怎佇網路頂拄著，然後加入這个專案，而且閣摻入去無純正ê計謀。
干焦是羽柔ê一念之間，予運命行向這條
凡勢佇閣較早前，命運就注定好好咧？
伊嘛是咧懷疑，但是落尾猶原毋知，佇伊去電腦冊店買一寡網路程式ê冊ê時陣。
「總是著買這本字典，」伊輕輕咬伊ê嘴唇皮，決意共逐間冊店走透透，揣看覓……
「歹勢，阮這爿無」、「這已經賣了矣」、「阮干焦有彼本……啥物？毋是汝佮意ê？」、「這馬逐家攏講國語，哪會有儂買這？」
行過十幾間冊店，甚至包含連鎖大冊店，攏無咧賣這號字典。羽柔憢疑，敢講是因為這是禁忌，致使in毋敢賣？越頭看見總統府，猶原是遐爾森嚴，坐佇介壽路ê路頭，伊想：臺語真正無啥物儂咧寫，檢舉這款敢有意義？閣行入頭前彼間看覓，無就煞煞去。
羽柔行入倒手爿ê冊店，冊店小寡仔暗趖趖，看起來是咧賣二手冊ê，舊冊窒甲狹櫼櫼，講起以早ê故事。顧店ê是一位中年ê阿叔，羽柔提出勇氣共用無偌輾轉臺語問：
「借問汝遐有徐金松ê閩南語抑是臺語ê字典mah？」
突然頭家假若起雞母皮，徛起來，向四周圍看，確認無儂注意，然後àⁿ 頭和伊講：「汝綴我來。」
店員就共𤆬到店後壁ê角頭，一个封起來ê冊櫥仔頭前，羽柔感覺略略仔phīn-phōng-chháiⁿ。
「到恁兜進前，千萬毋通共拍開！」
伊低聲煞嚴厲和羽柔提醒，然後共鎖匙拍開，自櫥仔上深ê所在——羽柔假若會當看見櫥仔內底有臺灣獨立，或者應該是體制外面ê寫ê雜誌，若提上珍貴ê珠寶仝款，共索仔敨開，然後扭掠共伊用牛皮紙包起來。
羽柔無講啥物，只是恬chuh-chuh看眼前ê一切，然後共這本字典收好，囥佇殕色ê揹仔底。
這本字典誠實不止仔重。
回程ê時陣，羽柔佇臺北北站排隊欲等國光號ê時陣，拄著丁育誠——伊是in大姊ê朋友，嘛佇C大讀冊。兩儂相借問了後，育誠問：
「汝這改去臺北做啥？」
「買臺語ê教材爾爾，因為我臺語講甲無偌好。」就算講甲無準確。
「汝這點足成汝大姊，伊佇學校ê時陣，有寫臺語歌，嘛想欲組建臺語ê社團，毋過誠可惜」一下發現討論話題變甲略略仔沉重，伊換話題講：
「汝認為臺語敢有文字？」
「我咧想應該有ê款？毋是有字典？」
「毋過我咧想，是按怎有當時仔我揣無文字？比如講『chhiau-chhōe』這个字，我嘛毋知伊ê漢字是啥。」
「若是羽安猶佇咧，伊一定會用教會ê拼音寫。」
「毋過這款文字，真濟儂干焦掠做是英語，無可能接受姑不而將ê寫法。」
「毋過羽安一定會誠堅持講……」
突然廣播聲喝講：15:20分往S城ê車kàu ah。
※ ※ ※
倒去稅ê房間內底，羽柔沓沓仔敨開字典，然後想起伊第一改看見著愛用幾若片軟碟片裝ê字典PDF，內底貯咧足濟撇音符號ê臺語音節，以及濟濟漢字佮英語字，伊頭眩目暗。
「若是羽安看著這本字典，一定足感動，我猶記得伊想欲收濟濟本臺語字典。」伊閣想著，若是臺語真正揣無字，哪會傳教士以及真濟學者咧試編字典？雖然感覺按呢ê熱情嘛是誠譀古。
「若是無羽安佮Theng彼款想欲用臺語寫ê疼心，絕對無儂會掠準講臺語有字。我敢真正有法度完成這个專案？何況另外ê『計畫』嘛需要彼才通完成……」
伊想一霎仔久，最後佇字典ê內頁落名：
「陳羽安＆陳羽柔」
※ ※ ※
暗時羽柔帶彼本字典，封面用牛皮紙封予絚絚，閣行入學校ê計算機中心，伊掀開字典，拍開Conexion，拄好羽柔上線：
Helen：我今仔日去重慶南路，買著字典啊
Theng：冊敢好chhōe？
Helen：我行入去十幾間冊店，chiah佇一間二手冊店chhōe有。
（koh有禁冊ê代誌，Theng哪會無講呢？羽柔心內按呢黜臭。）
Theng：誠辛苦leh~予汝加走hiah久。
Helen：是講，汝最近數位化臺語字典有平安無？
羽柔拍「平、安、無」這三字，心臟閣咇噗跳矣，帶著想欲閣較濟ê情報ê心，以及理智叫伊愛冷靜，全世界干焦賰鍵盤拍字ê聲音。
Theng：汝是按怎問chit ê問題XD？我拍字數位化ê進度lóng有leh照進度行leh？Iáu是汝驚我延chhiân？
Helen：無啦，只是想講最近風khah透，畢竟S城嘛，驚講汝寒著niâ-niâ……
（驚死，強欲共真正ê意圖敨出來矣）
Theng：汝大學mā佇S城！？
Helen：係ah，我大學佇K大學，啊汝咧？
Theng：我佇C大學，算隔壁leh！
Helen：啊chit ê計畫需要討論較好，敢ē當相見面？
羽柔感覺足歡喜，總算通和彼个催捒ê，抑是主謀見面，伊毋知影以後會按怎，毋過應該誠趣味。
Theng：好ah。看汝啥物時間有閒。
Helen：誠好！誠好！
Theng：見一下面niâ-niâ，就誠好啥物lah~XD
（啊，我愛較冷靜。若是予伊知影代誌就大條囉）
Helen：啊無佇國慶hit工？Hit工禮拜三，chiah歇一工。
Theng：無，就中晝佇C大學正門附近ê茗軒泡沬紅茶館見面？
Helen：好ah。是講「泡沬紅茶」beh án-nóa用臺語講咧？
Theng：「起pho紅茶」？我認為會當按呢講……
In那開講那歡喜，直到計算機中心欲關ê時。羽柔這時毋知影，in兩儂相見面，會按怎改變in ê命運，只是佇討論中，伊所看見ê，毋是假若違反國家法令ê份子，反轉是一个對對所意愛ê語言有興趣ê女子，熱情嘛予冰冷ê螢幕變做燒烙。
（雖然若是對伊閣較了解，就會當佇閣較捷去教官室內底提供閣較齊全ê情資，毋過我嘛真好奇，這款真有熱情做無予主流接受ê，閣假若極端，毋過嘛予我感覺厲害ê心志，到底是啥款？
但是伊若知影我是這款失格ê儂，可能落尾連朋友都做袂成，規个就變成一場空……）
落尾羽柔帶著萬千ê滋味，轉去伊租ê間仔，深深思考。東北風是那來那猛。
（後章）