羽典（第七章）
（頂章）
「……目前已經得到海外份子把晚清的字典轉成文字的結果，最快應該明年一月就能夠推出測試版本。但是因為裡面都是古早時代的詞，應該沒什麼思想問題。」
「要老實跟我說，Theng到底是誰？」教官猶是無滿意。
「她只說在文學院讀大二，還不想跟我見面。」羽柔略仔掣，毋過已經用規身軀ê氣力共不安硩咧。
「別以為我啥都不懂！」教官講甲予儂起雞母皮，對塗色ê牛皮紙橐仔，提出一張影印ê刊物，一个角頭寫，細細字煞真鑿目，閣刺插入心肝：
「詩佳作・灰色的魚缸／陳羽柔
幾千隻新長成的金魚
紙漿鑄下的鐵絲網內
繞圈繞圈繞圈
不是鬥快的馬
反而附於水面
渴望一絲氣息，藍天之上……」
「妳思想不忠誠！還敢入黨？」
「怎麽會有？是說學校讀書壓力過大，希望自由的意思！不是……」羽柔急甲強欲吼矣。
「人二裡面什麼都有！」第二个問題馬教官無按算共應：
「陳、羽、柔！這只是小菜，妳若肯好好合作，我既往不咎，不然妳就倒大楣了！」
後來，羽柔嘛毋知影按怎離開教官室，只有東北風佮冷冷ê小雨鑽入骨頭內底，予伊知影現實——伊袂記得夯雨傘矣。
伊生狂共雨傘褫開，咧想，敢欲閣繼續保守伊ê秘密？
「若是一下共秘密規組攏講出來，家己凡勢會當好好仔生活，只要莫插政治，就會當佇偉大領袖下底，以及當咧旺ê科技產業佮有潛力ê WWW行業，食就算無涼勢仔涼勢，嘛是誠體面，通講出喙ê工課，過順序ê生活。
且慢！教官已經共佇人二室ê記錄一部份展予我看，我若是按呢，教官無定袂放阮煞，我毋著一世儂做黨國ê抓耙仔？誠痛悔做出這號決定……
啊毋過Theng伊家己傷過固執無聽苦勸，閣繼續，早慢會予政府除掉，按呢我規盤攏展予教官嘛無差？」
佇羽柔毋知影滿面ê是冰冷ê雨水，抑是迷惑ê目屎ê時陣，眼前展現伊大姊彼个有自信ê笑容，以及Theng ê手予伊輕輕ê感觸——「thiàⁿ」佮「ài」到底差別是啥物？
「我彼當陣勸伊，無顧慮家己有任務ê身份，應該是超越『thiàⁿ』ê程度，毋過應該無可能是『ài』pah？
就算是，家己會接受嗎？」
羽柔那想那感覺親像一个淹水ê儂，最後予伊浮起去ê，是這句話：
「若是Theng beh展現伊對我ê『ài』，或者是『thiàⁿ』，就看明仔載伊對我ê態度。」羽柔偷偷仔展一个phok-khiat ê表情。
毋過羽柔無注意著，丁育誠佇行政大樓ê chhoa̍h對面，看見羽柔對教官室行出來，第二擺。
※ ※ ※
第二工，下晡兩點，計算機中心。
羽柔kā儲存字典ê CSV檔案ê 3.5磁片囥入去卡座內底，機器直直發出「tih-tih tah-tah」ê聲音，訴出家己ê寂寞。
心情小寡平靜，伊那拍開Conextion，那想，字典團隊有可能解散，和Theng ê關係以後愛按怎行ê時陣，Theng已經上線ah，個人資料註跤變做：「心肝想
「伊敢真正是欲會失禮，猶是有啥物話尾？」誠趣味，毋過這款程度羽柔才袂接受，閣偷偷仔笑一个。
伊用上客氣ê話共相借問：
「Helen：汝好
Theng：汝好
Helen：這kái beh討論啥物？」
我看見「Theng is composing…」顯示幾ā分鐘，可能Theng有足濟話想欲拍。毋過上尾干焦一逝：
「Theng：是講我chit站仔leh想，漢字ê問題，決定ah。」
「汝有啥物想法？」羽柔按呢拍字。
Koh過幾分鐘，Theng應：
「用漢字ê儂誠實有影濟，這个專案的確愛有漢字
毋過漢字ê整理可能愛開三四個月左右，佇這進前先開放羅馬字版，來做折衷。」
羽柔肩胛頭夯幾个，這猶著講？毋過若是逐家攏通退一步，嘛毋免遐歹看。只是拍：「誠好，就án-ne行」
「Theng：是講，我有khǹg測試表ê新結構ê CSV檔案，予汝看覓án-ne敢會當當做資料庫。」
Theng紲一份「羽典.csv」，羽柔一下開，結果伊ê面毋知影是欲笑，欲轉紅，抑是欲感覺礙虐：
# ver 0.12-我真正無應該對汝án-ne大細聲，應該著尊重汝
ê看法，予汝受氣我蓋歹勢。
# 有可能，禮拜六佇K大計算機中心敢會當相見？
# {}表示毋是文言音ê字：講話音、訓讀抑是借字
英語,華語,白話字,漢字
affection (love),情愛,thiaN3,{愛}
fond (doting),寵愛,lek8-ai3,溺愛
like (wish),喜歡,ài,愛
love,愛,thiaN3/sioh/thiaN3-thang3/po2-sioh,{愛}/{惜}/愛{痛}/保{惜}/{愛惜}
lover,愛人,sou2 thiaN3 e5 lang5/thiaN3 e5 lang5,所{愛之人}/{愛之人}
love song,情詩,cheng5-koa/cheng5-si/cheng5-su5,情歌/情詩/情詞
...
「小等咧，是按怎伊共這款ê語詞當做示範ê例？笑死。誠古錐。毋過按呢『佮意』ê意思就變做是『ài』，『愛』ê意思就是『thiàⁿ』。Hohⁿ，伊講毋著喔！」羽柔頕頭，共檔案重號名，傳起去：
「羽典-彼工下晡五點地點改茗軒.tsv」
※ ※ ※
拜六欲暗仔ê S城，茗軒猶原真濟儂客，羽柔本底想欲提早十分鐘到，無疑閣看著Theng佇內爿座位囥ê水色揹仔。「我閣無法度提早來矣！實在是……」羽柔佇心內按呢怨慼，毋過心內的確是歡歡喜喜。
Theng和伊相借問了後，就àⁿ 頭，共伊細聲講：「我知影雙爿攏有立場，汝嘛咧保護我，所以這件代誌我……」
羽柔隨插喙：「汝欲講遮ê代誌進前，愛回答我一个問題。」
「啥物問題？」Theng gāng佇遐，毋知欲怎樣。
「汝予我ê字典，作者共like寫做『愛』，love寫做『疼』，佮汝ê定義假若顛倒péng！」
「敢按呢？」Theng對懺悔ê面變做微微仔笑：「可能佮意、疼、愛是流動ê，隨儂ê定義無仝款。就親像兩个儂ê感情，是自由自在咧流，無儂通共伊阻擋。」伊ê面容敢若予玫瑰輕輕仔唚過。
伊那講，那提出一个柑仔色ê盒仔：「汝進前毋是講欲愛一臺隨身聽，我頂改袂赴予汝，汝會當提這錄序大儂講ê話，聽足濟改來練臺語……」
直直說多謝ê羽柔，閣較注神ê是，盒仔面頂ê紅色束帶，以及一粒幼秀ê chiŭ-chiú，假若翼股欲綴風咧飛……
店內毋知對佗位來ê一陣暖風吹過來。
（後章）