羽典（第八章）
（頂章）
坐佇o͘-tó͘-bái後壁ê雅婷，手拑牢車尾ê架仔，就算雅婷猶原有真濟無理解，是按怎佇昨昏暗送禮物彼當陣，Helen就提議講欲去山谷內ê L庄𨑨迌，而且風猶原siù-siù吹，但是伊感覺誠快樂。總算講有一工會當和新朋友做伙去附近ê所在旅行，橫直期中才考煞一兩禮拜，功課方面應該嘛無啥通掛慮。
而且毋知影是按怎，雅婷感覺Helen ê味，和記憶中ê羽安略仔無仝——一點仔無hiù芳水ê氣味，顛倒是較自然，就親像毋捌沐著足濟社會氣按呢，像佇冊卷內底激出來ê，天真ê清芳，就算等青紅燈ê時，邊仔ê車排出ê廢煙嘛無法度kā伊崁過。伊心內感覺足特殊。
雖罔雅婷毋知影，Helen彼種天真ê感覺會予伊未來致到啥物大ê衝擊，伊干焦想欲予拄和解ê靈魂，佇恬靜ê內山庄頭歇喘。
過無一點鐘，L庄到ah，伊佇山谷底恬恬歇睏。
Helen紮隨身聽，夯免裝底片ê翕相機，興奮行佇頭前，看見頭前ê火車勻勻仔駛入月臺，就算吐出真厚ê柴油味，致使後壁ê雅婷著掩鼻仔才通向前行，Helen猶原誠好奇，共列車翕一兩張相。
「遐爾興趣趣，汝敢是鐵路迷？」雅婷共Helen開耍笑。
「毋是啦，好奇爾爾。」Helen按呢微微仔笑，毋驚廢煙遇著伊圓圓ê面，看起來和一位對世界誠有興趣ê三歲查某囡仔仝款，予伊閣較得儂寶惜。
「汝對我ê專案，敢講嘛是好奇？」
Helen一下遲疑：「嘛是按呢iah~」
雖然雅婷看無伊半秒鐘ê遲疑，隱藏啥物毋是三言兩語ê。
In兩个儂笑笑，因為舊街仔儂蓋濟，誠狹kheh，in行無幾步，就佇關門足久ê舊戲院跤ê埕歇睏。這个庄頭較早是林業佮塗炭產業ê大本營，毋過隨著產業ê衰退，致到舊街仔那來那稀微，一直到最近鐵路旅遊佇旅行節目拍廣告，逐家才漸漸注意伊ê特色。
雅婷感慨，這間舊戲院嘛是對儂客規大陣，了後收戲院，直到有放假大陣𨑨迌ê人群，敢講世代嘛是仝款，有時落，嘛有時起？伊就問：
「汝感覺這間戲院未來敢會閣重開？」
Helen：「我相信，只是可能是新ê形式……」
忽然Helen看見邊仔ê擔有儂leh賣金魚，只要會當用薄縭絲ê衛生紙所做ê魚khat-á罟起來，金魚就是汝ê。Helen毋甘遐大陣ê金魚仔，直直金金看in佇箱仔內轉來踅去，結果猶原佇原本ê所在，無法度佇活水ê溪仔kap窟仔自由泅水。
雅婷看伊恬恬看金魚箱仔毋出聲，就問：「汝想欲耍hô͘金魚無？」
Helen輕輕仔搖頭，講：
「我無愛撈金魚。只是想起，以早我佇學校，寫過有關金魚ê詩。金魚偌爾仔媠……」
「汝感覺家己就親像內底ê金魚？」
Helen本底想欲講啥，顛倒話佇嚨喉就勼轉去，眼神帶著想欲閃避ê罪惡感，以及部份ê無奈，毋過毋敢講出喙。
※ ※ ※
「
in兩儂peh崎ê時陣，Helen做頭前。林仔內有白色ê ia̍h-á輕輕仔飛，咧走揣適合in ê芳花，因為樹仔略略仔òe-òe，秋天失去赤炎炎ê日光，溫柔穿過樹椏佮葉仔，留落一搭一搭，或者是一點一點ê光，予樹蔭加添斑斕ê色水。Helen咧用心愛ê隨身聽聽la-jí-o͘h，雅婷卻是咧看天ê景致，聽地上ê聲——
自突然一隻鳥仔飛佇面前ê樹仔頂，到對山壁bo̍k出來，chho̍k-chho̍k叫ê泉水聲，予伊袂記得電腦螢幕前ê複雜資料，以及人情世事政治ê紛紛擾擾。遮ê予伊思想這个山坑仔ê客話，攏是著疼惜ê代誌。
雅婷閣看見頭前ê Helen，佇peh崎ê路ni̍h小寡慢，除了想欲揣時間問Helen敢有好勢，嘛思想，這个專案結束了後，阮敢閣會當維持這馬ê關係？伊一爿呼吸自然ê空氣，閣佮Helen保持適當ê距離，一爿向望：
「向望時光會當擋恬佇遮就好……」毋過——
「Ai-ioh！」Helen因為傷過注意頭前斡角ê野花，突然跋一倒，佇peh坎仔ê時陣。
「汝有án-nóa無？」因為雅婷較捷咧運動，伊試共Helen插起來，閣共跤手ê塗粉輕輕掰走。
「無代誌，只是跤頭趺小寡擦到……」
因為Helen穿牛仔褲，而且坎仔嘛無偌懸，伊干焦跤頭趺小寡遛皮爾爾，無啥流血。
「猶是等咧食飽了後，咱去藥房買OK繃？」
「無要緊啦！涼亭仔欲到，先食飯閣講。」
佇兩儂開講ê時陣，隨身聽因為Helen跋倒ê時陣無張持硞著，變做錄音模式。
※ ※ ※
涼亭仔和古道仝款，除了定定來peh山ê兩三位仔ê登山客，基本上無啥物儂。只有遠遠ê鳥隻咧kiù-kiù叫。Helen拍開花粽，一陣清新閣淡雅ê英國花ê氣味湠入去伊ê鼻仔內底，假若佇伊ê鼻àng內跳làng-suh (dance)。
食了後，看見山跤ê庄頭，以及白色ê吊橋，和靜靜咧流ê溪仔水，伊問雅婷：
「花粽敢好食？」
雅婷對伊微微仔笑：「誠好食，感覺花芳佮粽ê氣味攏配合甲足合味，多謝汝𤆬我來遮，後擺著做伙來。曷汝咧？」
「真正袂䆀呢！這是我大姊介紹ê景點。」Helen假若共伊ê意念看透：「是講，這款ê時刻，汝感覺按怎？」
「有一个儂願意陪我，而且佇大自然放予空，誠實向望這款生活會當一直行落去。」
Helen無死心閣共伊問：「汝若是一世儂蹛佇遮，毋免插足濟紛紛擾擾ê代誌咧？」
雅婷恬恬毋出聲，共伊看一下，煞看山頂ê雲寬寬仔行。
Helen無法度，干焦看伊佇椅仔頂共身體伸勻，伊流汗ê頭毛略略仔亂，卻點仔感覺古錐。伊ê心嘛綴雅婷注目ê方向，袂記得身軀ê痛疼，佮雅婷做伙飛，佇自在ê空氣。
※ ※ ※
「若是羽典階段性做煞，汝欲做啥物？」欲歇睏煞ê時，Helen好奇共雅婷問。
「我可能會閣催捒其他ê臺語事工，」雅婷講：「比如講，爭取通刊臺語ê刊物。現此時干焦美國才有定期ê雜誌。」
「毋閣驚講政府會共汝掠做無歡迎ê儂，汝敢真正欲做？」Helen略略仔憂悶。
「我無向望予後一代活佇『臺語袂當寫』ê myth頂面，著到咱這代為止。」伊吐大氣：「若是一代一代攏按呢，按怎進步？總是向望咱變做自由ê儂，有用臺語佇主流文學雜誌刊ê自由。」
Helen恬靜一站仔，講：「這个理想真好。我這馬所向望ê，只是和心愛ê朋友，做伙分享生活，毋管是佇專案做好進前，抑是以後。」
這時Helen假若想著啥，講：
「我最近聽著一條韓國老歌，是咧學韓國語ê同學共我教ê。」
「誠特殊neh！啥物歌？」
「這條我mp3落山了後閣予汝，歌詞是按呢1：
佇春天ê交響樂四界響
青蘿山百合咧開ê時
我鼻著百合ê芳味
為汝唱歌
佇我若青蘿山ê心肝底
若百合花ê朋友啊
汝佇阮心內開花ê時
所有悲傷就攏無去」
跟綴Helen吟這條歌ê聲，雅婷款好物件，和伊落山。In咧想，凡勢毋管是佮意、thiàⁿ 、ài，總是攏相通——心花開ê時陣，悲傷就會走閃。
只是佇北面有一支山，深深閣厚厚ê烏雲罩咧，那來那大片。
（後章）