羽典（第六章）
（頂章）
今仔日下晡，我佇大學圖書館備辦期中欲考ê漢語通論佮中國思想哲學，圖書館逐个攏真恬靜，有ê拚勢讀眼前ê冊，煞有ê眼神空虛看眼前讀袂了ê論文。
我那讀那注神佇科目內底，煞「thiàⁿ」佮「ài」ê區別直直佇我ê心肝頭箍來箍去，引我思想：
漢語真濟詞ê意思佮語法功能會綴時代演變。親像老師所講ê，「打」這字佇宋朝歐陽脩ê時代進前，自原底有「拍、攻擊」ê意思，擴大做通紲接其他ê名詞，佮伊做伙變做關聯ê動詞，譬論講「打傘」；佇臺語，「
敢講若是我真正欲「ài」一个儂，嘛著帶想欲行做ê代誌，並且「著共伊行出來」，才通講是真正ê「愛」，毋但是「thiàⁿ」爾爾？對這位新熟似ê Helen，我對伊彼改ê動作，的確對伊小寡歹勢，但是我彼工家己ê心，有淡薄仔phi̍h-pho̍k跳，我ê目睭嘛有點仔失神幾秒鐘。敢是我叫是是伊ê大姊閣佇我ê面頭前？猶是因為罕得搜著會曉臺語ê知音，才有按呢ê代償？頭殼內假若有足濟碳酸水ê pho chhèng起去……
雅婷啊！汝毋通閣想矣，考試佇後日，閣愛準備。毋閣意識煞無屬家己，據在伊閣想起以早ê往事：
※ ※ ※
雅婷細漢時佇臺中街仔讀冊，放學ê時陣，有當時仔會行到三民路ê舊冊店，揣二手ê世界文學小說，以及語言學習ê冊——這是只有淡薄仔錢ê伊少數ê興趣。對伊來講，無論是《咆哮山莊》、《少年 Werthers ê煩惱》，以及短句「どのぐらい掛かりますか」、「わかりますか」，文學小說搭予伊一个歇喘ê空間，語言學習送予伊一扇看世間別位ê窗。原底想講這款ê生活會一直繼續落去。
直到有一工，冊店一疊字典內底，一本封面寫看無ê拉丁字佮連字號ê「廈門音新字典」，假若有啥物魔力，吸引伊ê目睭。雖然頭家問「汝敢看有？」，但是因為無偌濟錢，所以入手矣。
但是上大ê問題是，伊問親情朋友，內底ê拉丁字是啥物，欲按怎呼音，十个有十个攏幌頭，親像讀天書。毋過抱著「大學總是有遐濟gâu儂，無可能揣無袂曉讀ê儂」，伊紮著心肝頭ê疑問，佮這本字典，佇考牢大學以後，和熟似ê同學以及siăn-pái相借問，但是問題oân-á無解。當伊想欲放棄共脫手ê時，無意中閣佇學生餐廳拄著做伙讀C大ê高中同學育誠，講起這件往事，伊隨細聲共雅婷講：
「阮社團有一位會曉臺語拼音ê後輩，可能會當kā問看覓？」
※ ※ ※
彼時，毋知影這个紹介，會致到我ê生活引起遮爾大ê轉變——就算一切這馬成做水中煙、空中雲，親像無留啥物。
但是我ê生活，像予遮ê日子ê針所刻ê曲盤，伊ê笑聲、所共我教ê羅馬字、伊頭毛ê芳味，以及伊彼份自信ê笑神，是按怎攏會佇我上軟弱ê時陣浮現？Taⁿ 又閣面對彼位帶著仝款面容，仝款對臺語有好奇心ê伊小妹，我ê心毋知欲按怎決斷。
若是干焦用「thiàⁿ」相款待，我有可能雙頭無一耦，曷若是用「ài」向伊表明，毋知影伊敢會驚惶？而且我已經袂記得伊ê名，伊閣毋是伊大姊！汝毋通濫糝共舞甲花去！毋過我ê心是按怎會有siâng款ê反應？我共雙目瞌絚絚，心若像風湧當中ê帆船。
「毋過伊最近咧講伊欲愛一臺錄音帶隨身聽，送予伊應該無要緊？毋管是『thiàⁿ』抑是『ài』，應該攏會得過。」我最後落定論。
但是毋知影Helen願意接受無。
※ ※ ※
期中考考煞，阮約束佇禮拜六ê暗暝七點正聚集佇茗軒紅茶館。平常時攏in time才到位ê我，這改特別提早二十分鐘入去。水色揹仔內底，有囥一臺隨身聽，用柑仔色ê紙佮紅色ê束帶包裹，閣附一張黃色ê卡片。提出化妝ê細面鏡仔，斟酌看家己ê頭毛敢有走形。
佇六點五十五分ê時陣，忽然這个點仔閉思煞相siâng ê形影入來，佇伊反應過來以前，我共伊夯手招呼。伊一下意識著我先到，就問：「汝為啥物遮早著來？」
我笑嘻嘻kā應：「因為我為著好朋友，傷晏到驚歹勢。」
Helen ê目睭躊躇，毋知影欲做啥物反應，落尾講：
「汝真正對我誠好呢！」
阮雙儂講最近ê狀況了後，就開始討論《羽典》ê開發流程：
「所以OCR ê英文佮羅馬字部份，除了L字頭部份ê săm-phú-luh 以外，已經規本攏好勢矣？」Helen驚著。
「Hehⁿ 啊，Alex ê效率不止仔緊，干焦開兩禮拜就OCR了矣，連撇音符號都袂落勾。」
「若按呢，就會當共轉做英文—華語—羅馬字—漢字ê對應表，然後製造前後端界面，就會當予逐家搜揣囉！」
這時我感覺無適當，就kā伊應：「佇遮加添漢字無好。」
伊目睭擘甲足大蕊，大聲喝：「哪會按呢？我已經咧試共遮ê OCR 表格化閣加漢字矣。」
「毋閣汝敢有注意有一寡漢字正爿頂懸有加添圓箍仔？比如「Love……，thiàⁿ-sioh」邊仔ê漢字寫『愛°惜°』，加圓箍仔，意思是『愛惜』毋是本字，或者毋是文言音。若準講按呢直接公開，會予欲學臺語ê儂行歪chho\a̍h。」我掀開簿仔，佇紙頂那畫那說明，向望伊通了解。
「而且我咧推測，臺語足濟字無可能揣有本字，因為汝捌講，臺語接受著足濟毋是漢族ê語詞，而且遐濟圓圈ê漢字，就算有儂一个一个考查，可能幾十年後甚至逐家攏無佇咧ê時，猶是作不完。」Helen紲接講。
「Hehⁿ 啊，留漢字加費氣，共刣掉嘛是省汝ê時間。」
「但是臺灣抑是有真濟儂有漢字ê需求，毋是逐个攏像汝會曉白話字啊。而且對一般ê臺灣儂來講，就較歹學，足濟儂嘛掠做羅馬字毋成字。」
雖罔後來後悔，毋閣我ê性地予伊夯起來——「漢字嘛是著開踮國校仔六年ê時間，用足濟生字練習簿仔ê代價，才通學會起來。而且天下跤，chiâ規定愛用漢字寫臺語？一百年前傳教士就用羅馬字辦報紙啦。」
「汝嘛愛考慮著這馬ê處境！咱中華民國，政府講是中華文化ê復興基地，汝按呢講，驚會予戴帽仔ê泡茶，甚至閣較嚴重。聽我講好無？我按呢講嘛是保護汝。」伊聲量嘛無像以早較細聲，嘛那講那緊。
「就算咱用漢字，敢講戴帽仔ê就袂關心？」凡勢因為予磕著心內傷敏感ê所在，我煞無意識著心內是偌受氣，毋知影欲按怎講，落尾大聲應：
「既然無結論，先講到遮，後擺線頂討論閣講！」
佇伊離開ê時陣，我看著伊面頂掛著無法度說服固執序大儂ê無奈，目箍略略仔紅，無聲無說無越頭，行出紅茶館ê大門，伊ê頭毛予東北風吹甲亂操操，嘛無要無緊。我雄雄感覺後悔，我對伊ê感情，若是挑戰著我ê信念，欲如何呢？
我無心情啉賰ê lĕ-bóng茶——因為愈啉愈酸澀——納錢了後，沉重行出大門。按呢字典欲怎樣繼續我嘛毋知，只是聽著宵夜街仔ê小食店，咧放送這條歌，彼臺隨身聽猶原無送出：
「海中孤舟相思海 孤舟問天涯阮是揣君君毋知 波浪滿腹內
滿腹內 滿腹內 滿腹內
啊 海風傳情予伊知」
（後章）