羽典（第十章）
（頂章）
彼工落尾猶是到矣，天色因為烏雲崁牢這塊盆地，就算欲中晝，猶原是暗眠摸。羽柔徛佇公車頂，看著因為茫茫小雨滴佇窗外，街仔路佮捷運工程ê圍籬變做花花花，閣想起前幾工ê代誌。
伊彼工看見Theng所寫「這看起來只是一般ê討論會，應該無啥物問題」這款話，心肝強欲凝去，若當頭對面，會氣甲想欲共伊ê肩胛頭掠予絚，前後共伊搖醒：
汝當做彼工是啥物時陣，十二月初十neh！西方國家會用大蕊目睭共臺灣看詳細，有啥物爭差就點名做記號，政府敢會毋知？汝這个戇大呆！
毋過，換一面來看，伊可能嘛想講這和字典ê發展有足大ê關聯性，嘛無向望佇完成大部份ê情況之下，就按呢共收掉。雖然去嘛是狗吠火車，但是伊的確是對專案誠有熱心ê儂……羽柔感覺家己誠見笑，對專案無遐熱情，顛倒做無光明正大ê代誌。
最後，羽柔想講欲看內底敢有政府派來ê儂，驚講會做出對Theng不利ê跟綴或者是秘密chhiau證據，而且教官講若這改無佮Theng面對面掠著對證，就欲予我「好好仔款待」，只好共偷偷報名，順紲凊彩記錄一寡通應付教官ê糞埽情報。
司機喝講「T大到了！」，共羽柔趕轉去現實。伊看見T大ê商圈人山人海，予伊想起毋敢和Theng講ê——就算做這个專案遮爾久——ê疑問：
「若是保存語言，就是會區分彼此，按呢愛按怎促進臺灣各地ê儂團結？」
伊mā向望佇這个會議會當，佮Theng仝款，chhiau著答案。
※ ※ ※
學校ê小會議廳已經到矣，小雨嘛已經停止，毋過一層一層ê烏雲猶原佇咧天頂行來行去，無散去。開會十分鐘進前，羽柔行入去會議廳內底，內底會當坐差不多一百个儂，主席、與談人有ê猶未入去坐，下跤坐真濟相關團體ê成員以及關心ê學生，這時伊ê目睭佮Theng ê對相。
Theng想欲出聲ê時陣，結果予Helen使目尾叫伊恬恬，予Theng一个蓋大ê懷疑，囥佇心內底。這時Theng發現Helen咧提一本藍色ê簿仔——就是頭改見面彼本，伊就開始懷疑，敢講Helen無聲無說就綴伊入去，敢是欲搜揣對伊有害ê證據，入伊佇罪內底？Theng感覺略仔驚惶，毋過無定著Helen是欲保護伊才綴伊入去咧？因為若準講欲共伊創空，早前有足濟好機會，是按怎Helen無把握？
「總是，一切便看就好」，Theng吐幾喙大氣，落結論。
座談會開始矣。拄開始規个場攏總肅靜，就親像臺仔頂所掛ê三个領袖ê相。
代先主持人先邀請一位國音學ê教授，針對語文法禁止佇政府機關主辦ê集會使用「方言」佮相關聯ê看法，這位教授只是講，因為我國各省足濟方言口音，推動語言ê標準化以及共通語言ê普及有必要，而且面對著共匪提經濟實力佮咱捙拚，無按呢做就袂當團結面對危機，推動國語政策才是愛國ê行為。
只是予羽柔閣較好奇ê，毋是伊ê論述，是伊講話猶原帶鄉音——
羽柔突然想，伊猶原有家己ê爸母話。結果伊按呢犧牲，嘛是無法度予家己講話變做正港ê北京囡仔，到底是為著啥。
臺跤大半ê儂假若是咧看一齣國校仔校長佇台頂搬伊ê孤腳戲。
主持禮貌性應幾句了後，伊邀請一位客家ê意見領袖發表，伊主張語言ê差異定著佇咧，毋過真正ê團結，是尊重彼此ê差異，閣願意攏相佮合作，「
突然羽柔感覺心肝頭ê鎖「khiah」一聲拍開矣。原來差異毋是問題，問題是敢有法度尊重彼此ê差異，企圖滅無差異，反轉無法度解決遮ê問題，顛倒造成紛爭。伊閣想起家己幼稚ê行為，目箍轉紅。
毋過伊ê罪大甲無法度贖矣，油門催loeh，閣紡幾個月矣，國家ê機器已經發動，就無法度轉頭，若是予Theng知影嘛無得通諒解。伊毋知影欲如何才好，只好為著避免別儂發現，就忍牢目箍內底ê目屎。
紲落來是地方文史協會ê會長，雖罔年歲誠大，毋過猶原用中氣飽飽ê臺語講：
「大家攏知影，語文法是為著保存咱中華文化ê團結，毋過啥物是咱著保存ê文化？臺灣ê閩南語、客家語，或者是山地同胞ê語言，敢講嘛毋是中華民族ê文化？入聲、讀冊音，以及『參詳』、『借問』等等ê語詞，敢講毋是中華文化ê傳統？
英國有一个號做Wales ê所在，以早嘛佮臺灣仝款，用掛牌仔ê方式推動英語，結果因為Wales儂ê堅持，現在英國政府尊重in ê教育權，以及設立電視臺，法國嘛攏開始審視in ê語言政策。而且咱臺灣這馬大都市，國語早就是通行ê語言矣……」
伊講煞了後，有一寡學生拍噗仔。彼陣羽柔抄甲一半，突然發現著啥物，向後壁看。
結果佇後壁較烏暗，無儂坐ê所在，有兩个無sêng學生ê大儂，無專心咧聽，佇遐骨力抄寫記錄啥物。就算無穿制服，但是嘛無識別證，而且民間代表嘛無講半字破壞國家團結等等無愛國ê話。
伊用規身軀ê氣力硩牢心中ê驚惶，轉去頭前。
結果發現頭前彼三張領袖ê像ê目睭，金金共伊看，予伊心內起畏寒。
※ ※ ※
中場歇睏，Theng嘛咧好奇是按怎Helen會來，但是因為時間強欲無夠予伊寫提問單，所以伊無過去問。
「這箍白癡……明明和伊講袂當提問，煞無咧聽。In一定會佇會後共伊翕相，搦證據！」佇羽柔毋知影欲按怎ê時，突然伊發現，凡勢因為小會議廳舊ê電線傷過細，無遐耐大港ê電流，所以學校就牽足濟條新ê明線佇外面，就斟酌共伊看。
欲結束ê時陣，羽柔提寫好ê提問單，行到Theng邊仔，單仔落落去矣。當Theng抾著，欲共伊講進前一秒鐘，發現內底所寫ê：
「Lí sī kim-hî ah
Tiān-hóe hoa-khì ê sî, KÍN-CHÁU!」
後半場QA時間，主持儂開始讀逐家ê提問，有ê煩惱按呢對閩南語佮客家語等等ê「方言研究」，以及對臺語歌敢會有影響，雖罔內底ê國語會官員保證政府袂嚴格限制，但是感覺逐家攏足憢疑。
羽柔嘛咧想，若是斷去開發輸入法以及禁掉字典ê推出，佇這个數位時代，絕對是斷去臺語行向新時代ê機會，就算容允唱臺語歌、看臺語電視劇，長久以來，囝孫連『阿公』、『阿媽』都袂曉講。
「局勢實在對咱不利囉」伊誠慼心。照按呢講，這个專案著愛和Theng想欲按怎收煞，以及公開原始碼予儂接手。但是這馬著等待時間，保護Theng，毋是佇遐操煩ê時刻，伊按下家己ê情緒。
了後，主持儂開喙：「Theng ê提問：我是一个行線頂字典專案ê儂，字典毋但記錄字佮詞，mā記錄講這个話ê儂看世事ê方法、概念，甚至是故事，無遮ê，就無過去，逐家就無靈魂。針對語文法對字典ê限制，敢有學術上解套ê方法？」
羽柔這時吐大氣——佳哉無講傷過激進ê話，閣思考：「我佮伊ê字典，毋但是記錄語言ê故事，內底ê原始碼嘛是我佮Theng ê故事，無論是吵鬧以及合作。遮ê日子已經是我靈魂ê一部份，敢講Theng心內嘛按呢想？」
落尾，伊佇簿仔留一句：「Theng：字典記載講語言的人的靈魂，希望學術可以解套」，手提一罐貯滿運動飲料ê塑膠矸仔，向門外口行去。伊問顧門ê：「請問，洗手間在哪邊？」
「在正門。」
「OK……Oh！」伊假做硞著桌仔角，水矸仔ê運動飲料捙倒入去壁角ê臨時分電箱仔內底，ku-lu-ku-lu ê聲音滲入去縫內底，無得通倒轉。
干焦聽著分電箱仔「Chhu……」，霎仔久，bú-lè-kah (breaker)「Tap」一聲，跳予規間會議廳一片暗趖趖。原底逐家所講ê逐面立場佮逐句話，以及彼三張相，攏變做虛無。
佇稀奇聲佮垃圾話四界喝，規場亂紛紛ê時，彼兩个特務傱入去頭前ê人群。
羽柔那會失禮，心內那向望：「Theng ê劫數，這改會當閃過」。
空氣帶著飲料ê甜味佮甘酸ê lĕ-bóng味。
（後章）