羽典（第十二章）
（頂章）
隔轉工，羽柔倒去計算機中心，揣著離別儂上遠ê位置，開電腦，閣若鳥鼠仔仝款四界chhiau看，敢無其他ê儂看ǹg伊彼爿後，龜龜鱉鱉用Conexion共Peter所提供ê《自由台文》ê內容載落來。
伊一下開，看見頭一條是懷念故鄉小食擔ê短篇散文，咧佳哉無啥物怪奇ê內容ê時陣，讀著下跤ê詩，拄開始略略仔暢，煞顛倒起畏寒，目睭擘佮欲脫窗，喙嘛合袂起來——
「一ê舞女誠chē主儂
逐暝bōe睏 寂靜寂靜
直直giâu疑
敢有法度
毋免予in牽手
跳舞蹈 逍遙自在
Ho͘-thé-luh ê手銃訴bōe出答案
番薯ê子民，跤毋通彎
Khiā做一个臺灣囝……」
這敢毋是講鄭南榕ê主張，佮先總統hŏng暗殺失敗ê代誌！？
佇伊想欲用滑鼠趕緊搝甲下底，竟然有史明《臺灣儂四百年史——台文束結譯本選》、〈三百年苦嘆組詩〉、〈殕色ê冬山河：論宜蘭六輕ê危害〉……
羽柔毋知欲緊關掉視窗，抑是緊聯絡雅婷，只是gāng佇遐，尻脊骿chhèng出陣陣冷汗。
伊拚勢用終端機程式永永刣掉遮ê文字檔，暗想：「袂當提來處理eh，有這根本就保證坐監……」伊緊緊煞細聲回覆雅婷，代誌有影大條矣：
「汝敢毋知影？獨獨有chiah ê，就算無語文法，定著會食免錢飯！愛拒絕！」
「毋koh已經答應ah，taⁿ{} beh反悔驚講會失禮……」
「Che毋是面子問題，是生死ê問題！」羽柔這馬若是知影雅婷蹛踮ê宿舍，定著會潑伊咖啡，予伊醒。伊哪會遮無要無緊啊……！
「毋koh內底應該mā有思想較『正確』ê內容，mā是會當the̍h來用敢毋是？而且chit-má oân-á無儂beh接手ah？」雅婷佇拍字框仔直直更改伊ê文字，落尾留：「免煩惱lah，chiah ê檔案我會好好仔保管，然後kā內底較無安全ê thâi掉，chhun ê當做通chhōe ê語料，好無？」
「毋過干焦有chiah ê物件，穩死ê！汝愛聽我苦勸！！！」羽柔這時心內像針咧揻：雅婷啊！字典ê未來敢講比汝ê未來閣較重要千萬倍？敢講兩儂ê情誼就欲用上袂看口ê方式結束？
中心ê冷氣愈來愈寒，伊干焦向望雅婷這馬放下虛榮kap面子，啥物字典ê未來攏無去嘛無要緊，只要伊平安過日就好，閣直直默唸伊ê名字……
結果雅婷kā伊應：「是講我觀察著一項代誌」
「？」
「汝對我ê感情，真正比『thiàⁿ』koh較深——一般ê朋友無可能佇chiah危險ê場面救我」
「Hehⁿ ah？」羽柔毋知影這句ê含意。
「Hit日，我因為相信汝，chiah佇電火hoa去ê時陣逃走，」雅婷留落一段沉重ê符碼：
「汝chit改著相信我，好無？」
羽柔這時恬去，毋知影愛講啥物，對雅婷ê責備、期待、毋甘、不安，佇伊ê頭殼內絞來絞去，規个儂佇大風湧頂飄來飄去，毋知影方向。
結果羽柔ê頭前，看著兩个大个字「thiàⁿ」佮「ài」。
伊用橫柴夯入灶ê心，行出決斷。
※ ※ ※
羽柔對教官室倒來ah，雖然是透早，猶原落著茫茫ê小雨，飛佇無塊止ê大風。
伊本底佇去進前，早知著愛孤身一个擔誠衰ê代誌，結果出來ê時，就親像對地獄出來無siâng款——甚至毋是按呢，是反轉進入下一層閣較赤炎炎ê煉獄。
佇伊講本底想欲套雅婷ê資訊，煞因為會議室忽然失電，結果予伊逃走，揣無伊ê時陣，教官ê目睭干焦是野狼ê目仝款，直直刺插伊ê靈魂，講：
「妳每次都搞不好事情，是不是下次她會用飛的？還beta羅馬字版上線！說！」
雄雄按呢喝，羽柔gāng去ê時陣，教官閣對牛皮紙橐仔，提出一張表：
「妳學得很不賴嘛，難怪一直抓不到她！」
伊哪會有教會白話字班ê簽到表！假若教官室ê天篷強欲崩落去，毋過這馬毋是問ê時陣！
羽柔著急甲咧欲共雅婷ê資料紲予教官ê時，教官用上冷ê氣口講：「別說了！『潘、雅、婷』是不是？C大中文系，還真近呢……」
潘、雅、婷這三字重重bo̍k伊ê胸坎，感覺強欲倒去矣，發現用規个人格所隱瞞ê攏是虛空，原來一切攏袂當走閃。
「我們不需要妳了，妳和雅婷好自為之啊！」
伊落尾看著一尾大尾ê金魚，而且網仔已經佇水面頂矣。
羽柔ê心誠鬱卒，伊毋知影家己一時ê糊塗，毋但害著一个無辜，閣予伊家己嘛牽連受害，而且照這款ê情報，無定戴帽仔ê知影in有臺文月刊ê見本，毋過愛按怎共雅婷講咧？
這時，羽柔看見揹仔內底o͘-tó͘-bái ê鎖匙，伊予鎖匙沐著雨水，殘殘欲按呢做。霜風那來那大，雨ê絲線嘛強欲看無，佇深深ê冬天。
※ ※ ※
雅婷起床梳妝打扮了後，想講羽柔應該會和伊講後改著佇茗軒開講，著愛共伊撨時間。就收好伊ê課本佇揹仔，啉一喙烏咖啡，拍開Conexion——發現家己逐工透早攏開始leh固定開通訊軟體，可能心內ê依倚予伊變做這款習慣矣，毋閣煞有講袂出喙ê甘甜。
「到底伊向望當時方便咧？」伊那懷疑，那期待彼位疼惜伊ê朋友會當傳利便ê時間，伊向望毋是後日、明仔載，上好是今仔日中晝，甚至是這馬、right now。時到會當和伊講一寡親密ê話，一工ê無爽快就會無去……
只是伊看袂著見面ê時間地點，獨獨看著這兩逝歌詞，咖啡強強哽佇嚨喉：
「Heh heh heh一隻鳥仔吼chiù-chiù
哭kah三更一半暝 chhōe無siū……」
伊咧寫啥啊！？哪會是這條悲哀ê民謠，閣按怎揣無岫？真正霧sà-sà。毋過突然雅婷悟著啥物：
敢講有真大ê代誌想欲和阮講？毋過伊無寫地點，愛佗位揣……啊，in兜佇M大樓邊仔ê巷仔，凡勢我著去遐共問？
雅婷趕緊揹in ê揹仔，夯雨傘，緊緊傱出去，毋管咖啡無啉了。心肝頭煞有一寡驚惶，伊連確定ê位都毋知。
Hit塊收錄《自由台文》見本ê 3.5磁片嘛囥佇khă-báng內底。
雅婷緊piàng-piàng行對學校之間ê小巷，穿過真濟學校ê建築之間，總算來到K大門口附近ê M大樓。當伊咧大喙喘氣ê時，佇巷仔口有一台白色ê o͘-tó͘-bái，以及熟似ê面容……
「緊上車！了後才解說！」羽柔對伊弄手勢，低聲暗示。
伊佇信篤佮毋知之間，猶原連鞭上車。O͘-tó͘-bái起行，漸漸消失佇遠遠殕殕ê霧氣內。
但是一位C大ê查埔學生，恬恬佇chhoa̍h對角咧看這一切。
（後章）