羽典（第四章）
（頂章）
十月初十，光復路頂車流量猶原袂少，路n\i̍h ê雙爿邊佮安全島插了蓋濟赤藍色ê旗仔，綴冷sih-sih閣誠透ê風，鑽入去行路ê儂ê骨頭，逐家攏共手勼起來。
我一个儂雖然嘛會感覺畏寒，但是期待見著伊ê心，共伊硩牢矣，毋知影這个臺語無偌好，煞對臺語有興趣ê儂，到底生做啥款呢？心跳假若略略仔緊。
我斡入去一條無插旗仔ê街仔，恬靜ê街仔邊有chhāi細細支，無結霓虹燈，只是簡單寫「茗軒」兩字ê khăng-páng。向內底影一下，儂客無真濟，我抱綠色ê簿仔，毋知影Helen敢有佇內底。
我輕輕行入去，結果吸引我ê，毋是伊ê信物——藍色ê簿仔，是彼張相siâng ê面：
猶原是略略仔虯閣長ê頭毛，以及小寡仔圓ê面，但是掛ê毋是圓框仔ê目鏡，反轉是四角框ê目鏡，裝thāⁿ 假若無遐爾幼路，但是重巡猶是遐爾迷儂。不過伊ê表情有五分神祕，三分恬靜，兩分沉重，若像咧崁袂當出喙ê秘密。
應該就是伊ê小妹？閣想著最後和「伊」佇海墘ê相攬，以及藍色棚仔下跤和眼前ê伊頭一改見面ê形，頭殼就共in疊做伙，成做拆袂散ê影……足想欲和伊確認，毋過敢袂傷過毋捌場面？
佇我當咧失神ê時陣，伊雄雄掣一趒，原本ê表情一霎仔久，換做微微仔笑：
「汝是毋是Theng？是講『Theng』欲怎麼讀？」
聽這號聲，應該就是伊無毋著，我隨時共應：
「就讀做『Thêng』著好矣！是講最近字典數位化敢有著幫贊ê所在？」
「
Helen應該是南部囡仔，哪會臺語無in大姊輾轉呢？毋過伊猶是用臺語講，我是感覺誠有誠意啦，毋閣直接共問凡勢傷無禮貌，我就無共問，順伊ê話尾：
「我咧想，應該嘛是會當用OCR技術來共伊掃入去。」
「但是遮ê物件，臺灣ê大學應該無法度共掃入去，傷過敏感矣。」
「我有熟似一个踮美國ê有志Alex，我最近和伊聯絡，有可能伊會鬥數位化遮ê文字內容。」
「按呢袂䆀！若是會當加強OCR這關，就毋免花足濟時間佇打字。」
「但是可能只有英文佮羅馬字，漢字ê部份嘛愛人工key。」
「無要緊，到時閣輸入就會使。」
佇和伊講話ê時陣，我聽起來伊ê華語口音無佮in大姊羽安仝款，oân-á有點仔北部口音？照理講in兜高雄儂，袂按呢啊？佇開講ê時，我ê心內底積愈來愈濟ê疑問，毋過嘛是毋敢講。
伊大姊講，伊對語言學無啥物興趣，伊欲來加入這个專案應該會有因端。伊毋是講捌學過白話字？我足好奇，就問：
「汝較早毋是有講過，有學過一點仔白話字？是按怎汝想欲學咧？」
伊一下啉欶管內底ê紅茶，擋恬一點仔時間，就誠實講：「其實，因為我有一个親人佇規年前，邀請我去教會去學臺語ê教會拼音。彼當陣我毋知影號做白話字。因為以早細漢時陣踮佇臺北，所以我臺語無真輾轉，定定受著真濟懷疑，才想講學看覓。毋過我感覺因為教會ê 牧師教的方法傷過緊，綴袂著，到這馬猶毋知按怎讀變調，就中途退出矣。我感覺猶是真尷尬。」
「惜惜喔。毋過敢是因為這款原因，汝才想欲加入字典專案？」我感覺足毋甘，嘛希望伊會當佇字典專案揣著興趣。
Helen遲疑，煞接續講：「這是一个原因，毋過，嘛是因為彼位親儂ê緣故。我本底認為伊做ê是白費，但是伊捌和伊ê朋友常常用臺語寫作，我嘛真好奇臺語到底有偌濟魅力。」
佇我ê目睭前閣浮現羽安ê形影、伊ê笑面佮活力ê時陣——
「汝感覺，臺語是包容性ê語言，或者是干焦區別汝佮我ê語言而已？」
我想著羽安輾轉ê臺語，以及伊小妹講無幾字就欲切換到華語ê khê-khê，相比較，感覺誠複雜。一方面我咧催捒臺語，本底是想欲好好仔保存家己ê爸母話，無共出賣。伊的確是區別汝佮我ê語言——國家機器ê，以及地方流傳ê。但是，若準講有儂想欲學，敢講袂當用寬宏ê心相款待？
「我認為，臺語毋是干焦辨別汝佮我敢是仝陣儂ê家私爾爾。就親像臺語自原鄉ê百越民族佮歷代統治ê逐个民族，吸收真濟無siâng款來源ê用語，臺語的確是包容性ê。
我咧想，只要汝有堅心欲學轉來，所有ê儂攏會共汝相伨。」一定會按呢ê，至少最後我是按呢想。
這時，Helen ê目睭仁，有點仔光影閃爍。我閣啉頭前ê綠茶，雖然因為無糖，一屑仔澀澀，但是假若有點仔甘甜落尾péng過來，佇我ê嚨喉纏綿。
※ ※ ※
講到欲兩點ê時陣，Helen忽然想起啥，就共我問：
「暗時汝敢beh看臺北ê國慶煙火直播？」
我毋知影伊問這个問題是啥物意思，干焦講：
「阮C大內底ê學生餐廳八點電視就關起來矣，無可能看著煙火。」
「按呢真可惜，這工是國家ê大日子呢。」伊ê眼神正對我ê目睭，金金相。
「其實，這个日子雖然濟濟儂攏真歡喜，但是我猶閣希望，百工百業攏過甲真順序，會當掌握家己ê未來，按呢才是真正予儂歡喜ê日子。」雖然我毋知影按呢共政治立場講出來，Helen敢會佮意，但是訴出來ê話已經袂當搝轉去矣。
「逐家攏對臺灣這片土地ê未來，有無仝ê想法。」伊慢慢仔講：「總是，每个儂lóng會當做家己ê主儂，非常重要。」
毋過我猶原毋知影，伊家己敢真正認為，臺灣儂已經是主儂，或者是猶閣毋是主儂，總是伊知影我ê心意就好——佇結數ê時陣，我和伊pheⁿ 食飯ê錢，提出一張印孫中山ê銀票以及一寡儂頭是蔣一代ê銀角仔。
總是我咧想，交著這位熟似閣生分ê朋友，的確是真特殊ê存在。
我這工上尾改看著伊ê形影ê時陣，想著一條歌，意思是按呢：
「莫看恁目睭，莫看恁目眉，
一下看，攏是汝，
煞毋知家己……」
我輕輕吟這條歌，共伊幌手講再會了後，就向學校ê方向行，東北風猶原siù-siù叫，我ê心感覺略略仔雺雺無明，卻是有一點仔燒烙。
有可能伊佮「伊」ê形影，會成做字典完成ê跤踏石，嘛無定著會成做我性命足大ê幫贊佮力量。我足期待neh。
外面ê天氣突然無遐爾仔寒sih-sih，跤步嘛那行那輕鬆，就算旗仔猶原閣咧展。
日頭漸漸向學校西爿ê山崙落去。
（後章）